نجم سیٹھی کے مثبت بیان نے پشاور زلمی کی ناراضی ختم کردی،´جاوید آفریدی کا پشاور میں میچز کے انعقاد پر خیرمقدم
سکیورٹی اداروں کی جانب سے کوئٹہ میں بھرہور سکیورٹی کی یقین دہانی کرادی گئی ، اسی لیے میچز کرانے کا فیصلہ کیا، نجم سیٹھی
اسٹارز کرکٹرز ہمارا اثاثہ ہیں، ان کی خدمات سے فائدہ اٹھائیں گے تاہم قومی ٹیم کےلیے تجربہ کار غیرملکی کوچز کی تقرری کرینگے
نئی سلیکشن کمیٹی کا اعلان آج کیا جاسکتا ہے ،ایجنڈے میں بہت کچھ تھا جو مکمل نہیں ہوسکا، اب آج دوبارہ اجلاس ہوگا،گفتگو
لاہور( اسپورٹس ڈیسک) پاکستان کرکٹ بورڈ (پی سی بی) کی مینجمنٹ کمیٹی نے پاکستان سپرلیگ سیزن 2023 کے میچز کوئٹہ میں کرانے کا اعلان کردیا۔اطلاعات کے مطابق پاکستان سپر لیگ کے آٹھویں سیزن کے میچز بلوچستان کے دارالحکومت کوئٹہ میں کرانے کا اعلان کمیٹی سربراہ نجم سیٹھی نے مینجمنٹ کمیٹی کی پہلی مینٹنگ کے بعد نیشنل ہائی پرفارمنس سینٹر میں میڈیا سے بات کرتے ہوئے کیا۔انہوں نے کہا کہ سکیورٹی اداروں کی جانب سے کوئٹہ میں بھرہور سکیورٹی کی یقین دہانی کرادی گئی ہے، اسی لیے کوئٹہ میں میچز کرانے کا فیصلہ کیا۔نجم سیٹھی کا کہنا تھا کہ نئی سلیکشن کمیٹی کا اعلان کل کیا جاسکتا ہے جب کہ انہوں نے قومی ٹیم لیے لیے تجربہ کار غیرملکی کوچز بھی لانے کا عندیہ بھی دے دیا۔میڈیا سے گفتگو کرتے ہوئے کمیٹی سربراہ نے بتایا کہ ایجنڈے میں بہت کچھ تھا جو مکمل نہیں ہوسکا، اب ہفتے کو دوبارہ اجلاس ہوگا، فی الحال ہم نے سلیکشن کمیٹی سمیت تمام کمیٹیاں ختم کردی گئی ہیں۔انہوں نے یقین دہانی کرائی کہ ڈومیسٹک میں پاکستان کپ شیڈول کے مطابق ہوگا تاہم دوسرے تمام پروگرام روک دئیے گئے ہیں اور ڈومیسٹک کوچز کو بھی فارغ کیا جارہا ہے۔انہوں نے واضح کیا کہ اسٹارز کرکٹرز ہمارا اثاثہ ہیں، ان کی خدمات سے فائدہ اٹھائیں گے تاہم قومی ٹیم کےلیے تجربہ کار غیرملکی کوچز کی تقرری کریں گے۔کمیٹی سربراہ نجم سیٹھی نے پریس بریفنگ کے دوران مزید کہا کہ ماضی میں بھی غیرملکی کوچز کی تعنیاتی کا تجربہ کامیاب رہا تھا، کرکٹ کو درست سمت پر گامزن کریں گے، دوسری طرف نجم سیٹھی کے مثبت بیان نے پشاور زلمی کی ناراضی ختم کر دی،پی ایس ایل فرنچائز کے چیئرمین جاوید آفریدی نے پشاور میں انٹرنیشنل اور پی ایس ایل میچز کے انعقاد کی بات پر نجم سیٹھی کو سراہا ہے۔انھوں نے کہا کہ پشاور کے فینز اپنے شہر میں کرکٹ دیکھنے کیلیے بے تاب ہیں ، پشاور اور خیبر پختونخواکے شہریوں نے ملک میں امن کیلیے بڑی قربانیاں دی ہیں، جاوید آفریدی نے مزید کہا کہ پشاور زلمی نے ہمیشہ پی سی بی کے ساتھ مل ملک میں کرکٹ کی بحالی کیلیے کوشش کی۔ انشااللہ پی ایس ایل 9 میں ہماری ٹیم ارباب نیاز اسٹیڈیم میں ایکشن میں ہوگی