کراچی : ہواؤں کا رخ تبدیل ہونے کے باعث شہر قائد میں رات وصبح سویرے ہلکی خنکی محسوس کی جانے لگی۔
تفصیلات کے مطابق کراچی کا موسم تبدیل ہونا شروع ہوگیا ہے، محکمہ موسمیات کی جانب سے کہا گیا کہ مشرقی سمت سے چلنے والی ہواؤں کے باعث کراچی کا موسم گرم اور خشک ہے، آج دن میں موسم گرم رہنے کے ساتھ رات و صبح سویرے ہلکی خنکی محسوس کی جائے گی۔
موسم کا حال بتانے والوں نے کہا کہ موجودہ درجہ حرارت 28 ڈگری سینٹی گریڈ ہے، ہوا میں نمی کا تناسب 73 فیصد ہے، آج درجہ حرارت 35 ڈگری سینٹی گریڈ رہنے کا امکان ہے۔
دوسری جانب شہرِ قائد میں ہواؤں کی سمت میں تبدیلی کے باعث فضائی معیار مضرِ صحت سطح تک گر گیا ہے اور فضائی آلودگی کے عالمی انڈیکس کے مطابق کراچی دنیا کے آلودہ ترین شہروں میں چھٹے نمبر پر پہنچ گیا۔
محکمۂ موسمیات کے مطابق شہر میں ہوا میں آلودہ ذرات کی مقدار 158 مائیکروگرام فی کیوبک میٹر ریکارڈ کی گئی ہے، جو انسانی صحت کے لیے خطرناک قرار دی جاتی ہے۔