کراچی کے علاقے ملیر کالابورڈ کے قریب فائرنگ کے نتیجے میں نجی ٹی وی کے اینکر امتیاز میر زخمی ہوگئے۔
پولیس کے مطابق ملیر کالا بورڈ کے قریب کار پر فائرنگ سے نجی ٹی وی کے اینکر امتیاز میر زخمی ہوگئے، امتیاز میر اپنے بھائی کے ساتھ جا رہے تھے کہ اسی دوران موٹر سائیکل سوار ملزمان نے فائرنگ کر دی۔
پولیس کا بتانا ہے کہ فائرنگ سے امتیاز میر کے سینے اور چہرے پر گولی لگی جس کے بعد زخمی اینکر کو فوری طور پر قریبی نجی اسپتال منتقل کر دیا گیا۔
پولیس کا کہنا ہے کہ فائرنگ کے واقعے کے بعد ملزمان فرار ہوگئے، جائے وقوعہ سے گولیوں کے 2 خول اور ایک گاڑی برآمد ہوئی ہے۔
عینی شاہدین کے مطابق موٹرسائیکل سوار خاتون اور مرد نے فائرنگ کی، پولیس کا کہنا ہے کہ ابتدائی طور پر واقعہ ٹارگٹڈ حملہ لگتا ہے تاہم حتمی معلومات زخمی اینکر کا بیان لینے کے بعد سامنے آئیں گی۔
پولیس حکام کے مطابق واقعے کی ہر پہلو سے تحقیقات کی جا رہی ہیں جبکہ جائے وقوعہ اور اطراف کی سی سی ٹی وی فوٹیج بھی حاصل کی جا رہی ہیں۔