عمارت از خود ڈی سیل کرنے پر عدالت کا وکیل پر اظہار برہمی
کراچی:
سندھ ہائیکورٹ نے ایس بی سی اے کی سیل عمارت کو از خود ڈی سیل کرنے کیخلاف درخواست پر 48 گھنٹوں میں عمارت خالی کرنے کا حکم دیدیا۔
ہائیکورٹ میں ایس بی سی اے کی سیل عمارت کو از خود ڈی سیل کرنے کیخلاف درخواست کی سماعت ہوئی۔ ڈپٹی ڈائریکٹر ایس بی سی اے نے رپورٹ پیش کردی۔
رپورٹ میں کہا گیا کہ رہائشی عمارت میں اسکول چلانے پر 2023 میں عمارت سیل کی گئی تھی۔ ریکارڈ کے مطابق عمارت 2018 میں بھی کمرشل سرگرمیوں پر سیل کی جاچکی ہے۔
ایس بی سی اے کی لگائی سیل کو مالک یا کرائے دار نے از خود ڈی سیل کیا۔ 13 اگست کو ایک بار پھر عمارت کو سیل کیا گیا۔
فیلڈ اسٹاف نے متعدد بار عمارت کا دورہ کیا لیکن کمرشل سرگرمیوں کی رپورٹ نہیں ملی۔ فیلڈ اسٹاف کے دورے کے دوران عمارت کا دروازہ اندر سے بند تھا۔
از خود ڈی سیل کرنے کیخلاف متعلقہ عدالت میں فوجداری کارروائی کا آغاز کردیا ہے۔ عمارت از خود ڈی سیل کرنے پر عدالت وکیل پر برہم ہوگئی۔ عدالت نے 48 گھنٹوں میں عمارت خالی کرنے کا حکم دیدیا۔