میئر بیرسٹر مرتضیٰ وہاب نے کراچی میں سڑکوں، فٹ پاتھوں اور دیگر عوامی مقامات پر قابض منشیات کے عادی افراد کے خلاف فوری کریک ڈاؤن کا حکم دیا ہے۔
ڈان نیوز کے مطابق انہوں نے یہ ہدایات عوام کی جانب سے موصول ہونے والی متعدد شکایات کے جواب میں جاری کیں، جن میں شہری انفرااسٹرکچر کو نقصان پہنچانے, فلائی اوورز، پلوں، عوامی عمارتوں، پولز اور باؤنڈری والز سے چوری کے بڑھتے ہوئے واقعات کی نشاندہی کی گئی تھی۔
کراچی میٹروپولیٹن کارپوریشن کے ترجمان دانیال سیال نے کہا کہ نشے کے عادی افراد چوری کے ذریعے اہم انفرااسٹرکچر کو نقصان پہنچا رہے ہیں، چند روپوں کی خاطر وہ کراچی کی خوبصورتی، حفاظت اور عوامی املاک کو خطرے میں ڈال رہے ہیں۔
انہوں نے بتایا کہ میئر نے ہدایت دی ہے کہ عوامی مقامات پر پائے جانے والے نشے کے عادی افراد کو پہلے سٹی وارڈنز کے ہیڈکوارٹر منتقل کیا جائے اور پھر بحالی کے مراکز میں بھیجا جائے۔ انہوں نے کہا کہ ہر ضلع میں مخصوص ٹیمیں تعینات کی گئی ہیں، تاکہ یہ عمل محفوظ، انسانی ہمدردی پر مبنی اور منظم طریقے سے مکمل کیا جا سکے، اور اس بات کو یقینی بنایا جائے کہ یہ افراد دوبارہ ان عوامی مقامات پر قابض نہ ہوں۔
میٹروپولیٹن کارپوریشن کے ترجمان نے کہا کہ یہ مسئلہ مختلف اجلاسوں میں خاص طور پر عوامی انفرااسٹرکچر سے چوری اور نقصان کے حوالے سے بارہا زیر بحث آ چکا ہے، کے ایم سی پہلے ہی بحالی مراکز کے قیام کے لیے بڑے پیمانے پر زمین فراہم کر چکی ہے، تاکہ اس مسئلے کا طویل المدتی حل ممکن ہو۔
دانیال سیال کے مطابق ادارہ عوامی مقامات پر نظم و ضبط بحال کرنے، عوامی اثاثوں کے تحفظ، اور متاثرہ افراد کی سماجی بحالی کے لیے سنجیدہ کوششیں جاری رکھنے کے لیے پرعزم ہے۔ میئر بیرسٹر مرتضیٰ وہاب نے اتوار کے روز عوامی مقامات پر قابض منشیات کے عادی افراد کے خلاف فوری کریک ڈاؤن کا حکم دیا۔
واضح رہے کہ شہر میں سوشل میڈیا پر جامعہ کراچی اور اس کے اطراف میں منشیات کے عادی افراد کی موجودگی کی نشاندہی کے بعد پولیس نے فوری کارروائی کرتے ہوئے متعدد افراد کو حراست میں لے لیا۔