جماعت دہم جنرل گروپ ریگولر و پرائیویٹ اور سماعت و گویائی سے محروم طلبہ کے نتائج کا اعلان

نتائج میں شفافیت ہماری اولین ترجیحات میں شامل ہے،پوزیشنز حاصل کرنے والے طلباء و طالبات کو مبارکباد، غلام حسین سوہو

اساتذہ کرام اور بورڈ ملازمین کی انتھک محنت سے دہم جماعت کے نتائج جاری کر رہے ہیں،چیئرمین بورڈ


کراچی(اسٹاف رپورٹر)

ثانوی تعلیمی بورڈ کراچی کے چیئرمین غلام حسین سوہو کی خصوصی ہدایات پر ناظم امتحانات ظہیر الدین بھٹو نے جماعت دہم جنرل گروپ ریگولر وپرائیویٹ اور سماعت و گویائی سے محروم طلباء و طالبات کے سالانہ امتحانات برائے سال2025ء کے نتائج کے اجراء کا اعلان کر دیاہے۔ چیئرمین میٹرک بورڈ نے کہا کہ اساتذہ کرام اور بورڈ ملازمین کی انتھک محنت سے دہم جماعت کے نتائج جاری کر رہے ہیں۔اس موقع پر چیئرمین بورڈ غلام حسین سوہو نے کہا کہ نتائج میں شفافیت ہماری اولین ترجیحات میں شامل ہے انہوں نے جنرل گر وپ اور سماعت و گویائی سے محروم پوزیشنز حاصل کرنے والے طلباء و طالبات کو مبارکباد دی۔ یہ نتائج بورڈ کی ویب سائٹ www.bsek.edu.pk پردیکھے جا سکتے ہیں۔اس موقع پر ناظم امتحانات نے بتایا کہ جنرل گروپ ریگولر اور پرائیویٹ کے امتحانات میں 15497 امیدوار رجسٹرڈ ہوئے اور 14795امیدوار امتحانات میں شریک ہوئے جبکہ 702 امیدوار غیر حاضر رہے۔ نتائج کے مطابق البدر گرلز ہائر سیکنڈری اسکول عامل کالونی جمشید ر وڈکی ثناء بنت محمد ادریس رول نمبر551643 نے89.27 فیصد نمبرحاصل کر کے پہلی،ماما انڈیگو اسکول سسٹم نواب اسماعیل خان روڈ گرومندر کی بشریٰ بنت محمد عمران رو ل نمبر552443 نے87.73 فیصد نمبر کے ساتھ دوسری جبکہ تیسری پوزیشن بھی ماما انڈیگو اسکول سسٹم نواب اسماعیل خان روڈ گرومندر کی ہانیہ بنت محمد یوسف رول نمبر 552446نے 87.36 فیصد نمبر کے ساتھ حاصل کی۔
جنرل گروپ ریگولر میں 10222امیدوارامتحانات میں شریک ہوئے جن میں 2804طلباء اور 7418طالبات شامل ہوئے۔ کامیاب امیدواروں میں 108اے ون گریڈ، 971 اے گریڈ، 2157 بی گریڈ، 2471 سی گریڈ، 863 ڈی گریڈاور29نے ای گریڈحاصل کیا۔
پرائیویٹ جنرل گروپ میں 4573امیدوارامتحانات میں شریک ہوئے، جن میں 2935 طلباء اور 1638طالبات شامل ہیں۔کامیاب امیدواروں میں 13اے ون گریڈ، 294 اے گریڈ،1020بی گریڈ، 1181سی گریڈ،445 ڈی گریڈاور 18 نے ای گریڈحاصل کیا۔ تمام جنرل ریگولر اور پرائیویٹ میں مجموعی کامیابی کا تناسب 65.76 فیصد رہا۔
مزید براَں سماعت و گویائی سے محروم 124خصوصی طلباء وطالبات امتحانات میں شریک ہوئے،114طلباء و طالبات کامیاب ہوئے جبکہ کامیابی کا تناسب 91.94 فیصد رہا۔ ابساء اسکول فار دی ڈیف کورنگی کے سید سیف علی شاہ ولد گل شیر شاہ نے89.64فیصد نمبرکے ساتھ پہلی، حمیدہ حسن انصاری بنت عطاء الحسن نے 88.45فیصد نمبر کے ساتھ دوسری جبکہ ضیاء الرحمن ولدفضل الرحمن نے 86.18 فیصد نمبرکے ساتھ تیسری پوزیشن حاصل کی یہ تینوں پوزیشنز ابساء اسکول فار دی ڈیف کورنگی کے طلباء و طالبات نے حاصل کیں۔