پاک فوج ہماری قومی سلامتی کی ضامن ہے, چانسلر سرسید یونیورسٹی
کراچی(اسٹاف رپورٹر)
چانسلر سرسید یونیورسٹی آف انجینئرنگ اینڈ ٹیکنالوجی اکبر علی خان کا کہنا ہے کہ پاک فوج ہماری قومی سلامتی کی ضامن ہے نوجوان نسل نظم وضبط کے ساتھ جدید تعلیمی مہارتوں کو بروئےکار لاتے ہوئے ملکی ترقی میں اپنا حصہ ڈالیں
سرسید یونیورسٹی آف انجینئرنگ اینڈ ٹیکنالوجی میں یوم تشکر قومی جوش و جذبے کے ساتھ منایا گیا۔ اس موقع پر ایک ریلی کا انعقاد کیا گیا جس میں طلبہ نے بڑی تعداد میں شرکت کی۔ ریلی کے دوران پاک فوج کے ساتھ اظہار یکجہتی کرتے ہوئے ”پاک فوج زندہ باد” اور ”پاکستان زندہ باد” کے فلک شگاف نعرے لگائے گئے۔
ریلی میں سرسید یونیورسٹی کے چانسلر، اکبر علی خان نے خصوصی شرکت کی اور طلبا سے خطاب کرتے ہوئے کہا کہ پاک فوج ہماری قومی سلامتی کی ضامن ہے اور قوم کو ان پر فخر ہے۔ انہوں نے مزید کہا کہ نوجوانوں کو ملکی ترقی اور استحکام کے لیے اپنی تعلیم پر توجہ مرکوز رکھنی چاہیے تاکہ مستقبل میں ملک کی تعمیر و ترقی میں اپنا کردار ادا کر سکیں۔
اس موقع پر رجسٹرار سید سرفراز علی سمیت یونیورسٹی کے ملازمین اور اساتذہ کی بڑی تعداد بھی تقریب میں شریک ہوئی۔ تقریب کے اختتام پر دعا کی گئی جس میں ملکی سلامتی اور ترقی کے لیے خصوصی دعائیں مانگی گئیں۔