کراچی یونیورسٹی روڈ مکسڈ ٹریفک لین کھولنے کے لیے ہدف مقرر کردیا گیا ہے۔
ٹرانس کراچی کے اجلاس میں بی آر ٹی ریڈ لائن منصوبے پر پیشرفت کا جائزہ لیا گیا جس میں ایف ڈبلیو او نے یونیورسٹی روڈ کی مکسڈ ٹریفک لین 15ستمبر تک کھولنے کا ہدف مقرر کیا ہے جبکہ موسمیات فلائی اوور بھی مکسڈ ٹریفک کے لیے 20 ستمبر تک مکمل کرکے کھول دیا جائے گا۔
حسن اسکوائر سے نیپا پل تک بائیں جانب کی سڑک ستمبر کے تیسرے ہفتے میں کھولنےکا فیصلہ کیا گیا ہے، حکام کا کہنا ہے کہ حسن اسکوائر سے نیپا تک سڑک کی تکمیل میں تاخیر کی وجہ نئی سیوریج لائن کی تنصیب ہے، یونیورسٹی روڈ کے اطراف عمارتوں کے لیے نئی سیوریج لائن بچھائی جارہی ہے۔
علاوہ ازیں سماما اور نیپا کے قریب واٹر ٹینکر ایریا میں تعمیراتی کام تکمیل کے مراحل میں داخل ہیں، سماما اور نیپا کےقریب مختلف مقامات پر ریجڈپیومنٹ کا کام تیزی سےجاری ہے جسے مکمل ہونے کے بعد سڑک فوری ٹریفک کے لیے نہیں کھولی جاسکتی، سڑک کھولنے سے قبل ریجڈپیومنٹ کو کیورنگ اور میچوریشن کا وقت دیا جائے گا جبکہ زیر تکمیل کام ستمبر کے اختتام تک مکمل ہونے کی توقع ہے۔
ٹرانس حکام کے مطابق بعض مقامات پر کےالیکٹرک کی زیر زمین کراسنگز کے باعث تعمیراتی کام میں تاخیر ہوئی ہے، زیر زمین کراسنگز سمیت دیگر یوٹیلیٹی مسائل کے حل کے لیے اقدامات کیے جارہے ہیں، تعمیراتی سرگرمیاں بلاتعطل جاری رکھنے کے لیے مسائل ترجیحی بنیادوں پر حل کیے جارہے ہیں۔
علاوہ ازیں ریڈ لائن منصوبے کے تحت 12 کلو میٹر طویل اسٹارم واٹر ڈرینج سسٹم کی تعمیر بھی جاری ہے، برساتی پانی کی نکاسی کے نظام کی تعمیر کے لیے بھی مناسب کیورنگ ٹائم درکار ہے اور اس کا کام ستمبر کے اختتام تک مکمل ہونے کا امکان ہے۔
ٹرانس حکام کا کہنا ہے کہ ریڈلائن منصوبے پر مختلف مقامات پر متعدد آن گراؤنڈ چیلنجز کا سامنا ہے، آن گراؤنڈ چیلنجز کے باوجود تعمیراتی سرگرمیاں مسلسل جاری ہیں، انتظامیہ نے ایف ڈبلیو او کے تعمیراتی کام کی رفتار اور معیار پر مکمل اعتماد کا اظہار کیا ہے۔