این سی سی آئی اے نے دونوں قومی کرکٹرز کو دورۂ انگلینڈ کے حوالے سے تحقیقات کے لیے طلب کیا ہے: ذرائع
قومی کرکٹرز امام الحق اور محمد رضوان نیشنل سائبر کرائم انویسٹی گیشن ایجنسی (این سی سی آئی اے) لاہور کے دفتر میں پیش ہوگئے ہیں۔
دونوں کرکٹرز کو این سی سی آئی اے نے طلب کیا تھا، جہاں انہوں نے جواب جمع کرانے کے لیے مزید وقت مانگ لیا ہے۔
ذرائع کے مطابق دونوں کھلاڑیوں نے اپنے موبائل فون بھی این سی سی آئی اے کے حوالے کردیئے ہیں، جنہیں ان لاک کرایا جائے گا۔
ذرائع کا کہنا ہے کہ امام الحق اور محمد رضوان سے ڈریسنگ روم لیکس سے متعلق تحقیقات کی جائیں گی۔ دونوں کرکٹرز این سی سی آئی اے میں اپنا تحریری جواب بھی جمع کروائیں گے۔
خیال رہے کہ این سی سی آئی اے نے دونوں قومی کرکٹرز کو دورہ انگلینڈ کے حوالے سے تحقیقات کے لیے طلب کیا ہے۔
امام الحق اور محمد رضوان سے دورہ انگلینڈ سے متعلق معاملات پر پوچھ گچھ کی جائے گی۔ تاہم تحقیقات کے حوالے سے مزید تفصیلات سامنے نہیں آسکیں۔
اس سے قبل پاکستان کرکٹ بورڈ (پی سی بی) کی جانب سے پیر کو جاری ایک بیان میں کہا گیا تھا کہ میڈیا میں سامنے آنے والی رپورٹس کا اندرونی طور پر جائزہ لیا جارہا ہے اور معاملے کو بورڈ کے مقررہ قوانین اور طریقہ کار کے مطابق دیکھا جا رہا ہے۔
بورڈ کا کہنا تھا کہ تحقیقات کے دوران تمام متعلقہ افراد کا مؤقف اور دیگر پہلوؤں کو مناسب اہمیت دی جائے گی۔
پی سی بی کا مزید کہنا تھا کہ یہ عمل پی سی بی کے ضوابط کے تحت جاری ہے، جس میں تمام متعلقہ افراد کو مناسب طور پر زیرِ غور لایا جا رہا ہے۔
یہ پیش رفت پاکستان ٹیسٹ اسکواڈ کے دورۂ انگلینڈ کے دوران کھلاڑیوں کے مبینہ ڈسپلن اور آف دی فیلڈ رویے سے متعلق سامنے آنے والی میڈیا رپورٹس کے بعد ہوئی ہے۔
اس سلسلے میں محمد رضوان اور امام الحق کے نام مبینہ طور پر آف دی فیلڈ معاملات کے حوالے سے لیے گئے تھے۔