اسلام آباد: پیٹرول اور ڈیزل کی اصل قیمت پر شہریوں سے بھاری ٹیکسز اور مارجنزکی وصولی جاری ہے۔
ایک لیٹر پیٹرول اصل قیمت سے 133 روپے 2 پیسے اورہائی اسپیڈ ڈیزل اصل قیت سے 122 روپے 55 پیسے فی لیٹر مہنگا ہے۔
دستاویزات سے ظاہر ہوتا ہے کہ ایک لیٹرپیٹرول پر 131 روپے 60 پیسےکی لیوی، ٹیکس اور مارجنز کی وصولی کی جارہی ہے جب کہ فی لیٹر ڈیزل پر 122 روپے55 پیسے لیوی،ٹیکس اور مارجنز عائد ہیں۔
پیٹرول کی فی لیٹر لاگت 234 روپے73 پیسے بنتی ہے تاہم اس وقت پیٹرول کی فی لیٹر قیمت 367 روپے 75پیسے مقرر ہے۔
پٹرول اور ڈیزل کی قیمتوں میں مسلسل اضافہ جاری
پیٹرولیم ڈویژن کے مطابق گزشتہ 3 روز میں پیٹرول 21 روپے 88 پیسے فی لیٹر مہنگا کیا گیا ہے اور ڈیزل کی قیمت 3 روز میں 14 روپے 62 پیسے فی لیٹر بڑھی ہے۔
پیٹرول کی فی لیٹر قیمت 7 ستمبر کو 345 روپے87 پیسے فی لیٹر تھی اور اب پیٹرول کی قیمت بڑھ کر 367 روپے 75 پیسے فی لیٹر ہو چکی ہے۔
اسی طرح ڈیزل کی قیمت 7 ستمبر تک 378 روپے 5 پیسے فی لیٹر تھی جو بڑھ کر 392 روپے 67 پیسے فی لیٹر ہوگئی ہے۔