وفاقی وزیرِ خزانہ و محصولات سینیٹر محمد اورنگزیب نے واشنگٹن میں ورلڈ بینک اور آئی ایم ایف کے موسمِ بہار کے اجلاسوں کے دوران روتھس چائلڈ اینڈ کمپنی (Rothschild & Co) کے سینئر نمائندوں سے ملاقات کی ہے، جس میں چار سال کے وقفے کے بعد پاکستان کی بین الاقوامی مالیاتی منڈیوں میں واپسی کے فعال منصوبوں پر تبادلہ خیال کیا گیا؛ وزیرِ خزانہ نے وفد کو بتایا کہ حکومتِ پاکستان اپنی فنانسنگ حکمتِ عملی کو متنوع بنانے کے لیے یورو بانڈز، پانڈا بانڈ اور ڈالر سے منسلک روپے کے لین دین جیسے آلات پر غور کر رہی ہے، جبکہ پانڈا بانڈ کے اجرا کے لیے ریگولیٹری منظوری کا عمل آخری مراحل میں ہے۔ ملاقات میں روتھس چائلڈ کی جانب سے پاکستان کے ییلڈ کرو (Yield Curve) کو بہتر بنانے اور مارکیٹ کے اعتماد کی بحالی کے لیے لائبلٹی مینجمنٹ آپریشن (LMO) کی تجویز کو سراہا گیا، جبکہ دونوں جانب سے قرضوں کی لاگت کم کرنے کے لیے کثیر جہتی ترقیاتی اداروں کے تعاون سے بلینڈڈ فنانسنگ ٹرانزیکشنز کو فروغ دینے پر اتفاق ہوا۔ وزیرِ خزانہ نے ورلڈ بینک کے 10 سالہ کنٹری پارٹنرشپ فریم ورک کے تحت کلائمیٹ فنانس سپورٹ کا بھی ذکر کیا اور روتھس چائلڈ اینڈ کمپنی کی جانب سے پاکستان کی خودمختار ریٹنگ اور بانڈز کے اجرا کے حوالے سے مشاورتی تعاون کی پیشکش کا خیر مقدم کیا، جو ملکی معیشت کے بیرونی مالیاتی استحکام کے لیے ایک مثبت قدم ثابت ہوگا۔