ملک میں ہفتہ وار مہنگائی میں اضافہ ریکارڈ کیا گیا ہے اور ایک ہفتے میں 20 کلو آٹے کی قیمت میں 400 روپے تک اضافہ ریکارڈ کیا گیا ہے۔
ادارہ شماریات کے مطابق ملک میں ہفتہ وار بنیادوں پر مہنگائی میں 0.57 فیصد مزید اضافہ ہوا جبکہ سالانہ بنیادوں پر مہنگائی بڑھنے کی شرح 11.97 فیصد پر پہنچ گئی ہے۔
اعداد و شمار میں بتایا گیا ہے کہ ایک ہفتے میں 20 اشیائے ضروریہ کی قیمتوں میں اضافہ ہوا، 6 اشیاء سستی ہوئیں اور 25 کی قیمتیں مستحکم رہیں۔
رپورٹ کے مطابق ایک ہفتے میں آٹا 5.69 فیصد، مرغی 4.93 فیصد، دال چنا 3.99 اور ٹماٹر 2.40 فیصد مہنگا ہوا۔ اس کے علاوہ پیٹرول 2.40 فیصد، دال مسور، چائے اور ایل پی جی بھی مہنگی ہوئی۔
وفاقی ادارہ شماریات کے مطابق ایک ہفتے میں 20 کلو آٹے کی قیمت میں بڑا اضافہ ہوا، کراچی، اسلام آباد اور پشاور میں 20 کلو آٹا 3400 روپے تک پہنچ گیا ہے جبکہ راولپنڈی میں آٹے کا 20 کلو کا تھیلا 347 روپے مہنگا ہوکر 3333 روپے اور سیالکوٹ میں آٹےکا 20 کلو کا تھیلا 333 روپے مہنگا ہوکر 3133 روپے تک ہوگیا ہے۔
دستاویز کے مطابق سکھر میں آٹے کا 20 کلو کا تھیلا 300 روپے مہنگا ہوکر 3060 روپے تک میں فروخت ہو رہا ہے جبکہ حیدرآباد میں آٹے کا 20 کلو کا تھیلا 200 روپے مہنگا ہوکر 3200 روپے تک ہوگیا ہے۔
کوئٹہ میں آٹے کا 20 کلو کا تھیلا 70روپے مہنگا ہوکر 3030 روپے کا ہوگیا ہے جبکہ ملتان میں آٹے کا 20 کلو کا تھیلا 66 روپے مہنگا ہوکر 2866 روپے میں فروخت ہو رہا ہے۔
لاہور میں آٹے کے 20 کلو کے تھیلے کی قیمت 2300 روپے اور فیصل آباد میں آٹے کے 20 کلو کے تھیلے کی قیمت 2200 روپے تک برقرار ہے۔
وفاقی ادارہ شماریات کے مطابق ایک ہفتے میں کیلا 2.81 فیصد اور ڈیزل 1.37 فیصد سستا ہوا، آلو 0.89 اور چینی 0.37 فیصد سستی ہوئی۔
سالانہ بنیادوں پر مہنگائی کی شرح بھی بڑھ گئی
اعداد و شمار میں بتایا گیا ہے کہ ایک سال میں پیاز 100.24 فیصد مہنگا ہوا جبکہ اسی عرصے کے دوران ایل پی جی 68.55 فیصد مہنگی ہوئی۔ ایک سال میں بجلی چارجز 58.59 فیصد، پیٹرول 47.52 فیصد اور ڈیزل 42.52 فیصد مہنگا ہوا۔
سالانہ بنیادوں پر گندم کا آٹا 32.60 فیصد مہنگا ہوا جبکہ مرچ پاؤڈر 15.55 اور مٹن 15.02 فیصد مہنگا ہوا، ایک سال میں بیف 12.60 اور چکن 9.44 فیصد مہنگا ہوا۔ سادہ ڈبل روٹی 8.99 فیصد اور دہی 8.08 فیصد مہنگے ہوئے۔
ایک سال کے دوران آلو 39.51 فیصد اور ٹماٹر 37.07 فیصد سستے ہوئے جبکہ چینی 22.44، انڈے 18.88 فیصد اور نمک پاؤڈر 14.81 فیصد سستی ہوئے۔