ایران کے صدر مسعود پزشکیان کا کہنا ہے مسلم اور پڑوسی ممالک سے کوئی اختلاف نہیں، امریکا ہمیں دشمن بنانا چاہتا ہے۔
بھارتی دارالحکومت نئی دلی میں ملائشیا کے وزیراعظم انور ابراہیم سے ملاقات میں گفتگو کرتے ہوئے صدر مسعود پزشکیان کا کہنا تھا ایران کا اپنے پڑوسی ملکوں سے کوئی اختلاف نہيں، جنگ جاری رکھنا نہیں چاہتے، اب بھی امن کو ترجیح دیتے ہیں۔
ایرانی صدر کا کہنا تھا چاہتے ہیں ایرانی عوام کے حقوق کا احترام کیا جائے، اور ظالمانہ پابندیاں ختم کی جائيں، ایران اپنے بین الاقوامی حقوق چاہتا ہے۔
مسعود پزشکیان کا کہنا تھا ایران کا مسلم ممالک اور پڑوسی ممالک سے کوئی اختلافات نہیں، امریکا ہمیں دشمن بنانا چاہتا ہے، امریکا، اسرائیل، یورپی ممالک چاہتے ہیں علاقے میں کوئی ملک آزاد نہ رہے۔
قبل ازیں انڈین ٹی وی کو انٹرویو دیتے ہوئے مسعود پزشکیان کا کہنا تھا برکس اجلاس میں وہ تمام ممالک شریک ہوں گے جن کی سرزمین سے ہم پر حملہ کیا گیا تھا، امریکا ایران کی ناکہ بندی اور جارحیت بند کردے تو آبنائے ہرمزکھول دی جائےگی۔
انہوں نے کہا کہ امریکا کو ناکہ بندی اور پابندیاں ختم کرنی چاہئیں، امریکا جنگ کے ذریعے اپنے اہداف حاصل کرنے میں ناکام رہا تو ناکہ بندی کا قدم اٹھایا، سمندری راستہ کوئی ایسا راستہ نہیں جس پر ہماری زندگی کا مکمل انحصار ہو، امریکا اپنےاس طریقے میں بھی کامیاب نہیں ہوگا۔