وزیراعظم شہباز شریف نے پاکستان تحریک انصاف کو ایک بار پھر مشروط مذاکرات کی پیشکش کرتے ہوئے کہا ہے کہ اگر اپوزیشن مارچ اور دھرنے ختم کرے تو ان کے ساتھ بات چیت کے لیے تیار ہیں۔ اسلام آباد میں ایک تقریب سے خطاب کرتے ہوئے انہوں نے کہا کہ ڈھائی سال کی مسلسل محنت اور ٹیم ورک کے نتیجے میں ملکی معیشت کو پاؤں پر کھڑا کیا گیا ہے اور میکرو اکنامک استحکام حاصل ہوا ہے؛ انہوں نے افسوس کا اظہار کیا کہ ماضی میں مذاکرات کو کامیاب بنانے کی تمام تر حکومتی کوششیں بار آور ثابت نہیں ہو سکیں۔