عمران کا قومی اسمبلی میں واپسی کا عندیہ

نگراں سیٹ اپ کے لیے واپس جاسکتے ہیں، جلد شہبازشریف کی نیندیں حرام کریں گے، عمران خان

قومی اسمبلی کے حوالے سے پلان کرلیا، ن لیگ کے ایم این اے رابطے میں ہیں،پہلے ٹیسٹ کرینگے اور پھر شامل کریں گے

تحریک انصاف کی کراچی میں ہارنے کی اہم وجہ تنظیم کی کمزوری ہے، باجوہ ڈاکٹرائن میں کوئی زیادہ کمی نہیں آئی، میڈیا گفتگو

لاہور( مانیٹرنگ ڈیسک) پاکستان تحریک انصاف کے چیئرمین عمران خان نے قومی اسمبلی میں واپس جانے کا عندیہ دے دیا۔عمران خان نے زمان پارک لاہور میں سینئر صحافیوں سے گفتگو میں وزیراعظم سے اعتماد کا ووٹ لینے کے بارے میں کہا کہ جلد شہباز شریف کی نیندیں حرام کرنے والے ہیں ، قومی اسمبلی کے حوالے سے پلان کرلیا ہے، ن لیگ کے ایم این اے رابطے میں ہیں،پہلے ان کا ٹیسٹ کریں گے اور پھر شامل کریں گے۔عمران خان نے بتایا کہ یہ بری طرح پھنس گئے ہیں ، رات اسحق ڈار نے پٹرول کی قیمت بڑھانی تھی لیکن نہیں بڑھائی، اس کا مطلب ہے کہ اب آئی ایم ایف نہیں آئے گی، انہیں دو ارب ڈار کا قرضہ تو ملا جبکہ دو ارب ڈالر ترسیلات زر میں بھی کمی آگئی۔انہوں نے کہا کہ قومی اسمبلی میں نگراں سیٹ اپ کے لیے واپس جاسکتے ہیں ،باجوہ ڈاکٹرائن میں کوئی زیادہ کمی نہیں آئی ، باجوہ لیک کیس میں گرفتار صحافی شاہد اسلم کے حوالے سے احتجاج کرنے جارہے ہیں۔عمران خان نے زور دیا کہ ق لیگ کا مستقبل تحریک انصاف کے ساتھ ہے، ق لیگ بلے کے نشان پر لڑے گی تو ان کی جیت ہوگی ،میں بھی چاہتا ہوں کہ اتحاد والا کام ختم ہو۔کراچی بلدیاتی الیکشن میں شکست پر انہوں نے کہا کہ تحریک انصاف کی کراچی میں ہارنے کی اہم وجہ تنظیم کی کمزوری اور پیپلز پارٹی کی دھاندلی ہے۔۔دریں اثنا عمران خان نے موجودہ ملکی سیاسی صورتحال بارے پارٹی ترجمانوں کا اجلاس طلب کر لیا، پارٹی ترجمانوں کااجلاس زمان پارک میں عمران خان کے زیرصدارت ہو گا۔اجلاس میں کراچی، حیدر آباد کے بلدیاتی انتخابات اور ملکی سیاسی صورتحال کاجائزہ لیا جائے گا، پارٹی ترجمان ا?ئندہ سیاسی بیانیے کے حوالے سے متعدد تجاویز کا جائزہ لیں گے۔

اسے سوشل میڈیا پر شیئر کریں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

*

*
*