سندھ میں بلدیاتی انتخابات کے دوسرے مرحلے میں کراچی، حیدرآباد اور ٹھٹھہ ڈویژن کے 16 اضلاع میں 15 جنوری کو انتخابات ہوں گے لیکن مختلف نشستوں کے لیے کم از کم 727 امیدوار بلا مقابلہ منتخب ہوگئے۔
اے آر وائی نیوز کی رپورٹ کے مطابق ای سی پی کے فراہم کردہ اعداد و شمار سے پتہ چلتا ہے کہ کراچی سے مجموعی طور پر 7، حیدرآباد سے 410 اور ٹھٹھہ ڈویژن سے 310 امیدوار بلا مقابلہ منتخب ہوئے ہیں۔
بلدیاتی انتخابات کے دوسرے مرحلے کے لیے ای سی پی کی جانب سے مجموعی طور پر 8 ہزار 857 پولنگ اسٹیشنز قائم کیے گئے ہیں جبکہ 15 جنوری کو ہونے والے بلدیاتی انتخابات میں 17 ہزار 863 امیدوار آمنے سامنے ہوں گے۔
کراچی، حیدرآباد اور ٹھٹھہ ڈویژن کے 16 اضلاع میں بلدیاتی انتخابات کے دوسرے مرحلے سے قبل 49 امیدوار انتقال کرگئے۔ الیکشن کمیشن آف پاکستان کے مطابق یونین کونسل (یو سی) کے چیئرمین اور وائس چیئرمین کے 12 امیدوار کاغذات نامزدگی جمع کرانے کے بعد انتقال کر چکے ہیں۔
اسی طرح ضلع کونسل، ٹاؤن کمیٹی، میونسپل کمیٹی اور یوسی وارڈ ممبران کی نشستوں پر انتخاب لڑنے والے 22 امیدوار بھی انتقال کر گئے۔
سرکاری اعداد و شمار بتاتے ہیں کہ ڈسٹرکٹ ساؤتھ میں ایک چیئرمین اور وائس چیئرمین کے امیدوار انتقال کرگئے، اور ضلع وسطی اور مغربی اضلاع میں چیئرمین اور وائس چیئرمین کے چار امیدوار انتقال کرگئے، جبکہ ڈسٹرکٹ ایسٹ میں پانچ جنرل ممبران کے امیدوار انتقال کر گئے۔