دکانداروں نے ایل پی جی، آٹا، دالیں، مرغی،گوشت اور دودھ کی قیمتوں ميں من مانا اضافہ کردیا

ملک  بھر  میں دکانداروں کی جانب سے  ایل پی جی، آٹا، دالیں، مرغی،گوشت اور دودھ کی قیمتوں  ميں  من مانا اضافہ کردیا گیا۔

کراچی، لاہور، اسلام آباد، راولپنڈی، پشاور اور کوئٹہ سمیت بیشتر شہروں میں ایل پی جی600 روپے فی کلو تک پہنچ گئی۔گھریلو سلنڈر کی قیمت 7 ہزار  روپے تک پہنچ گئی۔ 

لاہور میں ایل پی جی کی سرکاری قیمت280  روپے جب کہ دکاندار کی من مانی قیمت ساڑھے 500 روپے فی کلو ہوگئی۔

کراچی میں مرغی ساڑھے 700 روپے فی کلو  ہوگئی۔کراچی اور لاہور میں گندم کا آٹا 190 روپے فی کلو ہوگيا۔ کوئٹہ میں 20 کلو آٹےکا تھیلا 3 ہزار 330 روپےکا ہوگیا ۔ 

بلوچستان بھر میں گندم کا بحران سنگین ہوگیا  ہے۔ خضدار ، چاغی، واشک،کیچ اور دیگر اضلاع میں 50 کلو آٹے کی بوری 8 ہزار  روپے سے تجاوز کرگئی۔

صوبائی کابینہ کی منظوری کے باوجود گندم کی خریداری تاحال نہ ہو سکی۔ ذرا ئع کے مطابق صوبائی حکومت نے 5 لاکھ 75 ہزار بوریاں گندم خریدنی تھی اب تک ایک لاکھ بوری بھی خریدی نہ جاسکی۔

کوئٹہ میں سبزیوں،گوشت اور دودھ کی قیمتوں میں بھی بیس بیس فیصد تک اضافہ ہوگیا ہے۔