کراچی: بحری قزاقوں کے حملے میں زخمی و جاں بحق پاکستانیوں کی میتیں اور زخمیوں کو آج شام وطن واپس لایا جائے گا۔
سومالیہ میں پاکستانی سفارتخانے کی جانب سے وزارت خارجہ کو موصول ہونے والے مراسلے میں بتایا گیا ہے کہ حملے میں جاں بحق ہونے والے بحری جہاز کے سیکنڈ افسر کاشف عمر، تھرڈ انجنیر محمود انصاری اور بوائلر آپریٹر کی میتیں آج شام 4 بجے پاکستان پہنچائی جائیگی۔
مراسلے میں کہا گیا ہے کہ کراچی ائیرپورٹ پر جاں بحق اور زخمیوں کی حوالگی اور ایمبولنس کے انتظامات مکمل کیے جائیں، جہاز کے عملے کے زخمی 4 ارکان کوبھی آج شام ایتھوپین ائیرلائن کی پرواز 694 سے لایا جائے گا، زخمیوں میں یاسر خان، عقیل خان، عثمان غنی اور شمس امین شامل ہیں۔
گورنر سندھ نہال ہاشمی خصوصی طور پر حکومت پاکستان کی نمائندگی کرتے ہوئے جہاز عملے کو کراچی ائیرپورٹ پر خوش آمدید کریں گے۔
اس حوالے سے کراچی ائیرپورٹ پر پاکستان ائیرپورٹ اتھارٹی کو انتظامات مکمل رکھنے کی ہدایت کی گئی ہے۔
وزارت خارجہ، اوورسیز پاکستانی فاؤنڈیشن کے حکام کو بھی کراچی ائیرپورٹ پر انتظامات مکمل رکھنے کی ہدایت کردی گئی ہے۔