پاکستان میں ڈالر کی عدم دستیابی اور عدم سیاسی استحکام کے باعث ڈالر تاریخ کی بلند ترین سطح پر پہنچ گیا۔ انٹربینک میں ڈالر کی قدر میں ایک دن میں ریکارڈ 24 روپے کا اضافہ ہوگیا۔
انٹربینک میں گزشتہ روز کاروبار کے اختتام پر ڈالر کی قیمت 230 روپے 89 پیسے تھی۔ آج کاروبار کے آغاز سے ہر گزرتے گھنٹے کے ساتھ ڈالر کی قدر میں اضافہ ہورہا ہے۔
انٹربینک میں ڈالر ایک ہی دن میں پہلی مرتبہ 24 روپے مہنگا ہوگیا اور تاریخ کی بلند ترین سطح 255 تک پہنچ گیا ہے۔ 255 روپے کا ایک ڈالر ہونے کے باوجود خریدنے والوں کو ڈالر دستیاب نہیں اور میڈیا رپورٹس کے مطابق ڈالر فروخت کرنے والے 260 روپے تک مانگ رہے ہیں۔
اوپن مارکیٹ میں بھی ڈالر کی قدر میں 12 روپے کا اضافہ ہوچکا ہے اور اوپن مارکیٹ میں ڈالر 255 روپے سے زائد میں ہی فروخت ہورہا ہے۔
ڈالر کی قدر میں مسلسل اضافے سے پاکستانی معیشیت بھی دباؤ کا شکار ہے اور ڈالر میں اضافہ کے ساتھ پاکستان کے گردشی قرضوں میں بھی اضافہ ہورہا ہے۔