بانی پی ٹی آئی عمران خان نے اپنے آرٹیکل سے متعلق دہرے جواب دیئے ، صحافی کے سوال پر پہلے کہا آرٹیکل خود لکھا ہے پھر کہا نہیں نہیں ڈکٹیٹ کروایا تھا، کالم کی پوری ذمہ داری لیتا ہوں ، الیکشن لڑنا مشکل کردیا گیا ہے ، انتخابات بروقت ہونے چاہئیں۔
تفصیلات کے مطابق پیر کو اڈیالہ جیل میں کمرہ عدالت میں صحافی کے سوال کہ کہا جارہا ہے آرٹیکل باہرسے لکھوایا گیا، کا جواب دیتے ہوئے بانی پی ٹی آئی نے کہا کہ میں دی اکانومسٹ میں چھپنے والے کالم کی پوری ذمہ داری لیتا ہوں۔
صحافی نے سوال کیا کہ کیا آپ نے لکھ کربھیجا یا زبانی ڈکٹیٹ کروایا؟ بانی پی ٹی آئی نے پہلے کہا انہوں نے خود آرٹیکل لکھا بعد میں کہا انہوں نے ڈکٹیٹ کروایا۔
صحافی نے مزید پوچھا کہ آپ نے کہا آپ کی تقریرآنے والی ہے کیا یہ تقریر وڈیو ہوگی یا آڈیو؟ بانی پی ٹی آئی نے جواب دیا کہ بہت جلد میری تقریر سوشل میڈیا پر آئے گی، آرٹیفیشل انٹیلی جنس کا زمانہ ہے۔
بانی پی ٹی آئی عمران خان نے مزید کہا کہ ہمارے لئے الیکشن لڑنا مشکل کر دیا گیا ہے لیکن اسکے باوجود الیکشن کا بروقت انعقاد ضروری ہے۔