کراچی: یہ تقرری سرچ کمیٹی کی سفارشات پر وائس چانسلر کی منظوری سے عمل میں آئی ہےڈاکٹر رفعت فرخ، کالج کے یونیورسٹی کا درجہ حاصل کرنے کے بعد پہلی پرنسپل ہیں، یہ تقرری ادارے کی تعلیمی ترقی میں ایک اہم سنگِ میل ہے اور کراچی میٹروپولیٹن یونیورسٹی کی اس پالیسی کی عکاسی کرتی ہے جس کے تحت تجربہ کار، مستند اور باصلاحیت ماہرین کو تعلیمی قیادت کی ذمہ داریاں سونپی جا رہی ہیں۔
ڈاکٹر رفعت فرخ ایک سینئر ماہرِ تعلیم اور ماہرِ امراضِ اطفال ہیں۔ وہ اس وقت کراچی میٹروپولیٹن یونیورسٹی میں پروفیسر آف پیڈیاٹرکس اور عباسی شہید اسپتال میں پیڈیاٹرکس وارڈ )ٹو (کی انچارج کے فرائض انجام دے رہی ہیں۔ انہیں انڈرگریجویٹ اور پوسٹ گریجویٹ میڈیکل تعلیم میں پچیس سال سے زائد کا تجربہ حاصل ہے اور انہوں نے تدریس، تربیت اور کلینیکل سپرویژن کے شعبوں میں نمایاں خدمات انجام دی ہیں۔
ڈاکٹر رفعت فرخ تعلیمی معیار، طلبہ کی رہنمائی اور فیکلٹی کی پیشہ ورانہ ترقی کی مضبوط حامی رہی ہیں۔ ان کی تیس سے زائد تحقیقی مقالہ جات قومی و بین الاقوامی سطح کے معتبر میڈیکل جریدوں میں شائع ہو چکے ہیں، جن کا مرکز بچوں کی صحت، نشوونما اور پیڈیاٹرک کلینیکل
نتائج ہیں، جو شواہد پر مبنی طبی عمل سے ان کی وابستگی کو ظاہر کرتے ہیں۔
کراچی میٹروپولیٹن یونیورسٹی میں وہ ادارہ جاتی نظم و نسق اور معیار کی بہتری کے عمل میں بھی فعال کردار ادا کر چکی ہیں۔ وہ کوالٹی انہانسمنٹ سیل، اینٹی وومن ہراسمنٹ کمیٹی، پروویڈنٹ فنڈ کمیٹی، کلینیکل کوآرڈینیشن کمیٹی، بورڈ آف فیکلٹی اور بورڈ آف اسٹڈیز سمیت متعدد قانونی و انتظامی اداروں کی رکن رہ چکی ہیں۔ اس کے علاوہ وہ پیڈیاٹرکس سبجیکٹ کنوینر کے طور پر بھی خدمات انجام دے رہی ہیں۔
ڈاکٹر رفعت فرخ پاکستان پیڈیاٹرک ایسوسی ایشن کی تاحیات رکن ہیں اور چائلڈ ہیلتھ اینڈ گروتھ ویلفیئر آرگنائزیشن کی بانی رکن اور جنرل سیکریٹری بھی ہیں، جو بچوں کی صحت اور فلاح و بہبود کے لیے ان کی خدمات کو ظاہر کرتا ہے۔ وہ کالج آف فزیشنز اینڈ سرجنز پاکستان (سی پی ایس پی ) میں سپروائزر اور ایگزامینر کے فرائض بھی انجام دے رہی ہیں اور بطور پیڈیاٹرک کنسلٹنٹ میڈی کیئر کارڈیک اینڈ جنرل اسپتال میں کلینیکل پریکٹس جاری رکھے ہوئے ہیں۔
ڈاکٹر رفعت فرخ کی بطور پرنسپل تقرری کو کراچی میڈیکل اینڈ ڈینٹل کالج کے لیے ایک مثبت اور مؤثر پیش رفت قرار دیا جا رہا ہے، جس سے ادارے کی تعلیمی ساکھ، کلینیکل تربیت اور عوامی خدمت کے مشن کو یونیورسٹی کے نئے تشخص کے تحت مزید تقویت ملنے کی توقع ہے۔