کراچی (خصوصی رپورٹ) وفاقی تحقیقاتی ادارے (ایف آئی اے) کے سب سے اہم اور حساس ترین زون کراچی میں بڑی تبدیلی کی بازگشت سنائی دے رہی ہے۔ ذرائع کے مطابق، پولیس سروس آف پاکستان کے گریڈ 20 کے سینئر افسر منتظر مہدی کی بطور ڈائریکٹر کراچی تعیناتی کا امکان ظاہر کیا جا رہا ہے۔ مہدی کو مبینہ طور پر نیب ترامیم کے بعد واپس آنے والے اہم ریفرنسز کے تناظر میں ٹاسک فورس موڈ میں تعینات کیا جا رہا ہے۔
ذرائع نے بتایا کہ ڈی جی ایف آئی اے راجہ رفعت مختار کی نئی تقرری کے بعد ادارے میں اسٹرکچرل ریفارمز اور پرفارمنس پر مبنی ازسرِنو تنظیم نو کا عمل تیزی سے جاری ہے۔ ڈائریکٹر ایف آئی اے کراچی، نعمان احمد صدیقی کی ایک ماہ کی چھٹی کے باعث، ملک کے مالیاتی حب میں کرپشن کے خلاف فرنٹ لائن قیادت کی فوری تعیناتی ناگزیر ہو چکی ہے۔
منتظر مہدی 2005 میں اے ایس پی کے طور پر پولیس میں شامل ہوئے تھے اور ساہیوال، بہاولنگر، قصور اور ننکانہ صاحب سمیت پنجاب کے متعدد اضلاع میں ڈی پی او کے عہدے پر فرائض انجام دے چکے ہیں۔ سندھ میں ایف آئی اے کی قیادت کے لیے انہیں سب سے مضبوط امیدوار تصور کیا جا رہا ہے۔
وفاقی وزیر داخلہ محسن نقوی کی جانب سے حتمی منظوری دیے جانے کا امکان ہے، تاہم ذرائع کے مطابق، سندھ کی حکمران جماعت پاکستان پیپلز پارٹی کی خاموش رضا مندی بھی اس معاملے میں کلیدی کردار ادا کر سکتی ہے۔ واضح رہے کہ نیب ترامیم کے بعد آصف علی زرداری، فریال تالپور اور ڈاکٹر عاصم حسین جیسے ہائی پروفائل کیسز ایف آئی اے کے سپرد کیے جا چکے ہیں۔
ذرائع کا کہنا ہے کہ نئی قیادت کے تحت نہ صرف تفتیش کا زاویہ بلکہ اس کی رفتار میں بھی نمایاں تبدیلی متوقع ہے۔ ڈی جی ایف آئی اے نے ان افسران کی نشاندہی بھی کر لی ہے جو تین سال سے زائد عرصہ سے ایک ہی زون میں تعینات ہیں جن کے تبادلے کا عمل جلد شروع ہونے کا امکان ہے۔