کراچی میں ایم اے جناح روڈ پر پٹاخوں کے گودام میں ہونے والے دھماکے میں جاں بحق ہونے والے نوجوان کی والدہ نے گودام کے مالکان کے خلاف ہرجانے کا دعویٰ دائر کر دیا ہے۔ یہ دعویٰ سٹی کورٹ کراچی میں دائر کیا گیا ہے۔
درخواست گزار کے وکیل، عثمان فاروق ایڈووکیٹ، کے مطابق یہ دعویٰ فیکٹری مالکان اور سندھ حکومت کے خلاف "جان لیوا حادثات ایکٹ” کے تحت دائر کیا گیا ہے۔ ان کا کہنا تھا کہ 21 اگست کو پٹاخوں کے غیر قانونی گودام میں ہونے والے دھماکے میں 16 سالہ سید اسد شاہ جاں بحق جبکہ سید اظفر شاہ شدید زخمی ہوا تھا۔
وکیل نے مؤقف اختیار کیا کہ یہ حادثہ فیکٹری اور گودام مالکان کی غفلت کی وجہ سے پیش آیا۔ انہوں نے بتایا کہ مقدمہ درج ہونے کے باوجود فیکٹری کو تاحال منتقل نہیں کیا گیا ہے۔ دعویٰ میں مطالبہ کیا گیا ہے کہ حادثے کے ذمہ داران ہرجانے کے طور پر 5 کروڑ 37 لاکھ روپے ادا کریں۔