مئیر کراچی نے طاقتور پانی چور مافیا کو سبق سکھادیا
ناظم آباد میں سندھ رینجرز اور واٹر کارپوریشن کی مشترکہ کامیاب کارروائی
8 غیر قانونی کنیکشن پکڑے گئے، یومیہ 30 لاکھ گیلن پانی چوری ہونے کا انکشاف،
عوام کے حقوق پر ڈاکہ ڈالنے والوں کے ساتھ کوئی سمجھوتہ نہیں کیا جائے گا، میئر کراچی, بیرسٹر مرتضٰی وہاب
پانی چوروں کے خلاف مقدمات ٹریبونلز میں چلائے جائیں گے، بیرسٹر مرتضیٰ وہاب
چیف آپریٹنگ آفیسر انجینئر اسداللہ خان بھی مافیا کے خلاف میدان میں آگئے
کراچی(رپورٹ: کامران شیخ )
پاکستان رینجرز سندھ اور واٹر کارپوریشن نے ناظم آباد کے علاقے میں مشترکہ کارروائی کرتے ہوئے غیر قانونی پانی چوری کے ایک بڑے نیٹ ورک کو بے نقاب کردیا, کارروائی کی نگرانی میئر کراچی و چیئرمین واٹر کارپوریشن بیرسٹر مرتضیٰ وہاب نے خود موقع پر پہنچ کر کی, اس موقع پر چیف آپریٹنگ آفیسر واٹر کارپوریشن انجینئر اسد اللہ خان بھی موجود تھے۔ حکام کے مطابق ناظم آباد کے علاقے میں سیف اللہ بنگش ہوٹل کے قریب خفیہ سرنگوں کے ذریعے 8 غیر قانونی کنیکشنز نصب کیے گئے تھے جن کے ذریعے روزانہ تقریباً 30 لاکھ گیلن پانی چوری کیا جا رہا تھا۔ ابتدائی تحقیقات سے یہ انکشاف ہوا ہے کہ تین ماہ قبل بھی اسی مقام پر غیر قانونی کنیکشن پکڑے گئے تھے مگر بعد ازاں پانی چوری دوبارہ شروع کر دی گئی۔ سندھ رینجرز نے اینٹی تھیفٹ واٹر کارپوریشن کے ہمراہ کارروائی کرتے ہوئے تمام آٹھ کنیکشنز ختم کر دیے جبکہ علاقے میں مزید ریکی بھی شروع کر دی گئی تاکہ اس نیٹ ورک کے دیگر ممکنہ مقامات کا سراغ لگایا جا سکے۔ تحقیقات میں یہ بھی انکشاف ہوا کہ پانی کے کنیکشن گھر کے تہہ خانے سے خفیہ سرنگوں کے ذریعے نکالے گئے تھے، یہاں تک کہ انسانی جسم سرنگ میں لیٹ کر کنیکشن جوڑنے کے شواہد بھی ملے ہیں۔ یہ غیر قانونی عمل نہ صرف شہریوں کے لیے بلکہ واٹر کارپوریشن کے نظام کے لیے بھی انتہائی نقصان دہ تھا۔ میئر کراچی بیرسٹر مرتضیٰ وہاب نے موقع پر میڈیا سے گفتگو کرتے ہوئے کہا کہ کراچی کے عوام کے حقوق پر ڈاکہ ڈالنے والوں کے ساتھ کوئی سمجھوتہ نہیں کیا جائے گا۔ پانی چوری کرنے والے عناصر کے خلاف سخت قانونی کارروائی عمل میں لائی جائے گی اور ان کے خلاف مقدمات عدالتوں اور ٹریبونلز میں چلائے جائیں گے۔ انہوں نے مزید کہا کہ سندھ رینجرز اور واٹر کارپوریشن کے اہلکاروں نے ایک انتہائی خطرناک اور پیچیدہ کارروائی کو بہادری سے انجام دیا جس پر وہ ان کو خراجِ تحسین پیش کرتے ہیں۔ میئر کراچی کا کہنا تھا کہ پانی چوری کا خاتمہ شہریوں کے مفاد میں ہے اور یہ مہم بلا امتیاز شہر کے تمام علاقوں میں جاری رہے گی تاکہ ہر شہری کو اُس کا جائز حصہ صاف پانی کی فراہمی یقینی بنائی جا سکے۔