اسلام آباد (7 اکتوبر 2025): جعلی پیغامات کے ذریعے شہریوں کی ذاتی معلومات چرائے جانے کے انکشاف کے بعد نیشنل سائبر ایمرجنسی رسپانس ٹیم (این سرٹ) نے صارفین کیلیے الرٹ جاری کر دیا۔
ایس ایم ایس، واٹس ایپ اور کالز کے ذریعے فشنگ حملوں میں اضافہ دیکھا گیا۔ این سرٹ کے الرٹ میں کہا گیا کہ کسی نامعلوم لنک پر کلک نہ کریں اور مشکوک پیغامات یا کالز کا جواب دینے سے گریز کریں، بینک اکاؤنٹ، شناختی کارڈ نمبر یا او ٹی پی کوڈ کسی کے ساتھ شیئر نہ کریں۔
یہ بھی پڑھیں: بی آئی ایس پی نے جعلی نوٹس کے حوالے سے عوام کو خبردار کر دیا
این سرٹ نے الرٹ میں کہا کہ غیر تصدیق شدہ ویب سائٹس یا لنکس کے ذریعے لاگ ان سے پرہیز کریں، فِشنگ پیغامات میں انعامات، لاٹری یا بینک الرٹ کا جھانسہ دیا جاتا ہے، شہری احتیاط برتیں اور جعلی نمبروں کو فوری بلاک کریں۔
مزید کہا گیا کہ مشکوک لنک پر کلک ہونے کی صورت میں فوراً پاس ورڈ تبدیل کریں اور متعلقہ ادارے کو اطلاع دیں، موبائل اور ای میل اکاؤنٹس میں دوہری تصدیق فعال رکھیں، جعلی پیغامات اور کالز کے خلاف فوری کارروائی کیلیے نیشنل سائبر ایمرجنسی ٹیم سے رابطہ کریں۔
الرٹ کے مطابق کوئی بھی ادارہ فون یا ایس ایم ایس پر پاس ورڈ یا او ٹی پی کوڈ نہیں مانگتا، فشنگ حملے ملکی سطح پر بڑھ رہے ہیں ہوشیاری اور آگاہی ہی بہترین دفاع ہے۔