اسلام آباد (7 اکتوبر 2025): سابق سینیٹر و رہنما جماعت اسلامی پاکستان مشتاق احمد خان اسرائیلی قید سے رہا ہو کر اردن پہنچ گئے۔
نائب وزیر اعظم و وزیر خارجہ اسحاق ڈار نے اپنے بیان میں تصدیق کی کہ گلوبل صمود فلوٹیلا میں شامل سابق سینیٹر مشتاق احمد خان کو چھوڑ دیا گیا ہے، وہ اس وقت اردن میں پاکستانی سفارتخانے میں موجود ہیں۔
یہ بھی پڑھیں: مشتاق احمد خان سمیت تمام پاکستانیوں کی رہائی کیلیے ایک یورپی ملک سے رابطے میں ہیں، اسحاق ڈار
اسحاق ڈار نے بتایا کہ ان کی صحت بہتر ہے اور حوصلہ بلند ہے، وہ اردن میں پاکستانی سفارتخانے میں محفوظ ہیں، سفارتخانہ ان کی خواہش اور سہولت کے مطابق پاکستان واپسی میں سہولت دینے کو تیار ہے۔
انہوں نے مزید کہا کہ تمام دوست ممالک کا شکریہ ادا کرتا ہوں، وزارت خارجہ کے ساتھ تعاون اور مدد کرنے پر دوست ممالک کا شکریہ۔
مشتاق احمد خان کے آفیشل فیس بک اکاؤنٹس سے جاری ویڈیو مین بھی ان کی اسرائیلی قید سے رہائی کے بعد اردن پہنچنے کی تصدیق کی گئی۔
واضح رہے کہ مشتاق احمد خان گلوبل صمود فلوٹیلا میں شامل تھے جو غزہ کے فلسطینیوں کی مدد کیلیے اسپین سے روانہ ہوا تھا لیکن اسرائیلی بحریہ نے تمام کارکنوں کو منزل تک پہنچنے سے قبل ہی گرفتار کر لیا تھا۔