کراچی(کرائم رپورٹر)وفاقی تحقیقاتی ادارے کی کراچی میں کارروائی’ سمندری راستے سے پاکستانی شہریوں کے غیرقانونی بیرون ملک منتقلی میں ملوث اہم اشتہاری ملزم پکڑا گیا’تفصیلات کے مطابق وفاقی تحقیقاتی ادارے نے ملک بھر کی طرح کراچی میں بھی غیرقانونی سرگرمیوں میں ملوث عناصر کے خلاف سخت گھیرا تنگ کر رکھا ہے۔ غیرقانونی منی ایکسچینج سمیت انسانی اسمگلنگ اور کاپی رائٹ سمیت دیگر سنگین جرائم میں ملوث مافیا کی کمر تؤڑنے کیلئے ایف آئی اے کے چھاپوں کا سلسلہ جاری ہے۔
ترجمان ایف آئی اے کے مطابق یہ کارروائی ڈائریکٹر جنرل ایف آئی اے رفعت مختار کی ہدایت پر کی گئی، جس کے تحت انسانی اسمگلنگ میں ملوث نیٹ ورکس کے خلاف ملک گیر کریک ڈان جاری ہے۔ایف آئی اے حکام کے مطابق گرفتار ملزم محمد علی سمندر کے راستے پاکستانی شہریوں کو غیر قانونی طور پر بیرون ملک بھجوانے میں ملوث تھا۔ وہ شہریوں کو جیوانی کے راستے ایران اور عراق پہنچانے کا جھانسہ دیتا تھا۔
ملزم کی گرفتاری ایک متاثرہ شخص کی شکایت پر عمل میں لائی گئی، جس کو ملزم نے عراق میں ملازمت دلوانے کا وعدہ کرکے ڈیڑھ لاکھ روپے ہتھیائے تھے۔ترجمان کے مطابق متاثرہ شہری کو بعد ازاں عراق سے ڈیپورٹ کرکے پاکستان واپس بھیجا گیا۔ تحقیقات سے انکشاف ہوا ہے کہ محمد علی جیوانی کے راستے بیرون ملک غیر قانونی سفر کروانے والے ایک منظم گروہ سے رابطے میں تھا۔ایف آئی اے نے ملزم کے خلاف باقاعدہ مقدمہ درج کرکے مزید تفتیش شروع کردی ہے۔ ترجمان کا کہنا ہے کہ انسانی اسمگلنگ میں ملوث عناصر کے خلاف کارروائیاں بلا امتیاز جاری رہیں گی۔