لاہور (2 اکتوبر 2025): جماعت اسلامی پاکستان نے گلوبل صمود فلوٹیلا پر اسرائیلی حملے کے خلاف احتجاج کا اعلان کر دیا۔
امیر جماعت اسلامی پاکستان حافظ نعیم الرحمان نے پریس کانفرنس میں گلوبل صمود فلوٹیلا پر اسرائیلی حملے کی مذمت کی اور احتجاج کا اعلان کیا۔
حافظ نعیم الرحمان نے کہا کہ گلوبل صمود فلوٹیلا پر اسرائیل نے حملہ کیا ہے، پُرامن قافلے میں جماعت اسلامی کے سابق سینیتر مشتاق احمد خان سمیت 5 رہنما موجود ہیں جبکہ انسانی حقوق کے کارکن، نیلسن منڈیلا کے پوتے، یورپی پارلیمنٹ کے رکن اور صحافی بھی شامل ہیں۔
انہوں نے اعلان کیا کہ کل پورے ملک بھر میں احتجاج ہوگا جبکہ 4 اکتوبر کو مارچ کیا جائے گا، 7 اکتوبر کو پورے ملک میں اسرائیل کے خلاف مظاہرے ہوں گے۔
ان کا کہنا تھا کہ فلسطین کا معاملہ ہمارا ایمانی اور انسانی مسئلہ ہے، فلسطین میں امداد نہیں پہنچنے دی جاتی اور وہاں بے شمار بچے شہید ہو چکے ہیں۔
حافظ نعیم الرحمان نے مزید کہا کہ اسرائیلی جارحیت دنیا بھر کا امن تباہ کر رہی ہے، امریکا اسرائیل کو نسل کشی کا لائسنس دے چکا ہے۔
امیر جماعت اسلامی پاکستان نے کہا کہ امریکی صدر ڈونلڈ ٹرمپ کا مجوزہ غزہ امن منصوبہ امن اور انسانیت سے کوئی تعلق نہیں رکھتا بلکہ اس میں صرف اسرائیل کے تحفظ کے امکانات ہیں اور فلسطین کا ذکر ہی نہیں۔
ان کا کہنا تھا کہ ڈونلڈ ٹرمپ کا مجوزہ غزہ امن منصوبہ دراصل مظلوموں کے مزید قتل کا منصوبہ ہے، منصوبہ ماننے سے کشمیر پر ہمارا مؤقف کمزور ہوگا۔
حافظ نعیم الرحما نے یہ بھی کہا کہ حماس کے رہنما چاہتے ہیں کہ جنگ بندی ہو۔