کراچی (اسٹاف رپورٹر) سی ویو اپارٹمنٹس کی حدود میں ایک کار سے سابق فوجی میجر اور ایک خاتون کی لاشیں برآمد ہوئیں، پولیس نے واقعے کی تحقیقات شروع کر دی ہیں۔
پولیس کے مطابق لاشیں بدھ کی صبح کار کی پچھلی سیٹ سے ملی ہیں، اور ابتدائی اندازے کے مطابق دونوں افراد تقریباً 24 گھنٹے قبل جاں بحق ہو چکے تھے۔ گاڑی کا انجن اور ایئر کنڈیشن چل رہا تھا، شبہ ہے کہ دھوئیں کے باعث دم گھٹنے سے اموات واقع ہوئیں۔
متوفی سابق میجر نیشنل ہائی وے اتھارٹی کے ساتھ وابستہ رہے تھے۔ ان کے بیٹے نے اطلاع دی تھی کہ والد پیر کے روز گھر واپس نہیں آئے اور فون بھی بند تھا۔
پولیس سرجن ڈاکٹر صمیہ سید کے مطابق لاشوں پر تشدد یا کسی اور غیر فطری عمل کے نشانات نہیں ملے۔ دونوں لاشوں کو جناح پوسٹ گریجویٹ میڈیکل سینٹر منتقل کر دیا گیا ہے جہاں مزید فرانزک اور کیمیائی ٹیسٹ کیے جائیں گے تاکہ موت کی اصل وجہ سامنے آ سکے۔
پولیس نے واقعے کا مقدمہ درج کر کے تحقیقات شروع کر دی ہیں