اولڈ ٹریفورڈ مانچسٹر میں ٹیسٹ میچ میں پاکستانی مداح کے ساتھ پیش آنے والا واقعہ دنیا بھر میں زیر بحث!
ٹیسٹ میچ کے پانچویں دن بھارت نے ناقابلِ یقین مزاحمت کرتے ہوئے ایک یقینی شکست کو ڈرا میں تبدیل کر دیا۔ تاہم، میچ کے اختتام پر ایک ناخوشگوار واقعہ خبروں کی زینت بن گیا۔ دورانِ میچ ایک شائق، جو روایتی سبز رنگ کی پاکستانی کرکٹ جرسی پہنے ہوئے تھا، کو سیکیورٹی اہلکاروں نے جرسی اتارنے کا مطالبہ کیا۔
ابتدائی طور پر، ایک بھارتی نژاد سیکیورٹی اہلکار نے اس مداح سے رجوع کیا، تاہم مداح نے جرسی اتارنے سے انکار کر دیا۔ بعدازاں مزید سیکیورٹی اہلکاروں کو طلب کیا گیا تاکہ صورتحال کو قابو میں رکھا جا سکے۔
مداح کا مؤقف تھا کہ گراؤنڈ میں موجود کسی بھارتی تماشائی کو اس کی پاکستانی جرسی سے کوئی اعتراض نہیں تھا۔ کچھ ہی دیر بعد مقامی پولیس موقع پر پہنچ گئی اور مداح کو اسٹیڈیم سے باہر لے جا کر مختصر گفتگو کے بعد واپس جانے کی اجازت دے دی گئی۔
تاہم، یہ معاملہ حساس نوعیت اختیار کر گیا ہے، خاص طور پر بھارت اور پاکستان کے درمیان موجود حالیہ کشیدگی کے تناظر میں۔ دونوں ہمسایہ ممالک کے درمیان تعلقات پہلے ہی نازک موڑ پر ہیں، اور اس طرح کے واقعات کشیدگی کو مزید ہوا دے سکتے ہیں۔
اس سے قبل بھی بھارت چیمپئنز بمقابلہ پاکستان چیمپئنز کا میچ سیاسی اختلافات کی وجہ سے منسوخ کر دیا گیا تھا، اور اب پاکستانی جرسی پہننے والے مداح سے روا سلوک یقیناً ایک نیا تنازع پیدا کر سکتا ہے۔