مصطفیٰ عامر قتل کیس میں پولیس نے تفتیش مکمل کر لی ہے اور ملزمان ارمغان اور شیراز کے خلاف عبوری چالان پراسیکیوشن آفس میں جمع کرا دیا ہے۔ عبوری چالان میں اہم شواہد اور گواہوں کے بیانات شامل کیے گئے ہیں، تاہم پراسیکیوٹر نے بعض قانونی اعتراضات لگا کر چالان تفتیشی حکام کو واپس کر دیا ہے۔
ذرائع کے مطابق پولیس کی جانب سے عبوری چالان آئندہ ایک یا دو روز میں دوبارہ جمع کرائے جانے کا امکان ہے۔ عبوری چالان میں بتایا گیا ہے کہ کیس میں 14 سے زائد گواہان کو شامل کیا گیا ہے، جن میں دو عینی شاہدین نے ملزمان کو شناخت کیا ہے۔ دونوں گواہوں کے بیانات دفعہ 164 کے تحت مجسٹریٹ کے سامنے ریکارڈ کیے گئے ہیں۔
چالان کے مطابق عینی شاہدین نے ارمغان اور شیراز کو مصطفیٰ عامر کے قتل میں براہ راست ملوث قرار دیا ہے۔ پولیس رپورٹ میں انکشاف کیا گیا ہے کہ ارمغان نے مصطفیٰ کو گھر بلا کر اس پر بدترین تشدد کیا، جس کے بعد شیراز کے ساتھ مل کر اسے مصطفیٰ کی ہی گاڑی میں بلوچستان منتقل کیا گیا۔
مزید بتایا گیا ہے کہ ملزمان نے بلوچستان پہنچ کر گاڑی کو آگ لگا دی، جس میں مصطفیٰ عامر کو زندہ جلا دیا گیا۔ پولیس نے چالان میں اس واقعے کو سنگین نوعیت کا قتل قرار دیا ہے اور عدالت سے استدعا کی ہے کہ ملزمان کے خلاف مقدمہ چلایا جائے۔