ٹینکر ڈرائیور اور کلینر کو جوڈیشل مجسٹریٹ شرقی کی عدالت میں پیش کیا گیا
کراچی میں ملیرہالٹ میں تیز رفتار ٹینکر میاں بیوی اور بچے کو کچلنے کے کیس میں عدالت نے ملزمان کو 3 روزہ جسمانی ریمانڈ پر پولیس کی تحویل میں دے دیا۔
جوڈیشل مجسٹریٹ شرقی کی عدالت میں ملیر ہالٹ میں تیز رفتار ٹینکر کا میاں بیوی اور بچے کو کچلنے کے کیس میں ملزمان ٹینکر ڈرائیور اور کلینر کو عدالت میں پیش کیا گیا۔
سماعت کے دوران تفتیشی افسر کی جانب سے ملزم کے جسمانی ریمانڈ کی استدعا کی گئی، تفتیشی افسر نے بتایا کہ ملزم کے خلاف مقدمہ میں دفعہ 322 شامل کردی ہے، تفتیش کرنی ہے کہ کہیں یہ واقعہ ذاتی دشمنی کا تو نہیں۔
عدالت نے کہا کہ ہیوی ٹریفک کا تو ان اوقات میں داخلہ بھی ممنوع ہے، وکیل ملزم نے جواب دیا کہ واٹر ٹینکرز کو سڑکوں پر آنے کی اجازت ہے۔
اس پر عدالت نے کہا کہ معلوم کریں کہ جس روٹ پر ٹینکر آ رہا تھا وہاں اسے اجازت تھی یا نہیں؟ تفتیشی افسر منصور علی نے جواب دیا کہ ہم نے ٹینکر مالک کا بھی معلوم کرنا ہے۔
اس کے ساتھ ہی عدالت نے ملزم کو 3 روزہ جسمانی ریمانڈ پرپولیس کی تحویل میں دے دیا۔ واقعے کا مقدمہ تھانہ ماڈل کالونی میں مقدمہ درج ہے۔
واضح رہے کہ کراچی میں گذشتہ دنوں ملیر ہالٹ بس اسٹاپ کے قریب موٹرسائیکل سوار خاندان ہیوی ٹریفک کی زد میں آ گیا تھا۔ پولیس کے مطابق شوہر اپنی اہلیہ کو چیک اپ کرانے کے لیے موٹرسائیکل پر اسپتال لے جارہا تھا، اس دوران پانی سے بھرے واٹر ٹینکر نے موٹر سائیکل سوار خاندان کو کچل دیا۔
حادثے کے نتیجے میں خاتون اور مرد شدید زخمی ہوئے، بعد ازاں خاتون اور مرد دم توڑ گئے، جاں بحق ہونے والے میاں بیوی تھے۔ پولیس کے مطابق بیوی حاملہ تھی جس نے زخمی حالت میں بچے کو جنم دیا، موقع پر موجود لوگ بچے کو لیکر اسپتال کی طرف بھاگے لیکن بچہ بھی جانبر نہ ہو سکا۔