آئی سی سی چیمپئنز ٹرافی 2025 کے چھٹے اور اہم میچ میں نیوزی لینڈ نے بنگلادیش کو شکست دے کر ایونٹ کے سیمی فائنل کیلئے کوالیفائی کرلیا۔
بنگلادیش کی جانب سے دیا گیا 237 رنز کا ہدف کیوی ٹیم نے 5 وکٹوں کے نقصان پر حاصل کرلیا۔ راچن رویندرا نے شاندار سنچری بنائی۔
پنڈی کرکٹ اسٹیڈیم راولپنڈی میں کھیلے جانے والے اس میچ میں نیوزی لینڈ نے بنگلادیش کے خلاف ٹاس جیت کر پہلے بولنگ کرنے کا فیصلہ کیا۔
بنگال ٹائیگرز نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 236 رنز بنائے۔
بنگلادیش کے کپتان نجم الحسن شانتو 77 رنز بنا کر ٹاپ اسکورر رہے، جبکہ لوئر آرڈر بیٹر ذاکر علی نے 45، رشد حسین نے 26 اور اوپنر تنزید حسن نے 24 رنز بنائے۔
نیوزی لینڈ کی جانب سے مائیکل بریسویل نے 10 اوورز میں 26 رنز دے کر 4 کھلاڑیوں کو آؤٹ کیا۔ ول او رورکی نے 2 جبکہ میٹ ہینری اور کائیل جیمیسن نے ایک ایک وکٹ لی۔
ہدف کے تعاقب میں کیوی ٹیم کا آغاز اچھا نہ تھا جہاں کین ولیم سن 5 اور پاکستان کے خلاف سنچری بنانے والے ول ینگ صفر پر پویلین لوٹ گئے۔
ایسے میں راچن رویندرا نے پہلے ڈیون کانوے کے ساتھ 57 اور پھر ٹام لیتھم کے ساتھ 129 رنز کی پارٹنرشپ بنا کر میچ کو بنگلادیش سے دور کردیا۔
ڈیون کانوے 30 رنز بنا کر آؤٹ ہوئے جبکہ لیتھم کے ساتھ ناصرف سنچری پارٹنرشپ بلکہ اپنی سنچری بھی مکمل کرنے کے بعد راچن رویندرا 112 رنز بنا کر پویلین لوٹے۔
اختتامی لمحات میں لیتھم 55 رنز بنا کر رن آؤٹ ہوئے، تاہم نیوزی لینڈ پر اس وکٹ کے گرنے کا اثر نہیں پڑا، کیویز نے پانچ وکٹوں پر ہدف 47ویں اوور میں حاصل کرلیا۔
گلین فلپس 21 اور مائیکل بریسویل 11 رنز بناکر ناقابل شکست رہے۔
بنگلادیش کی جانب سے تسکیم احمد، ناہید رانا، مستفیض الرحمان اور رشد حسین نے ایک ایک وکٹ لی۔
ٹاس کے موقع پر گفتگو کرتے ہوئے نیوزی لینڈ کے کپتان نے کہا تھا کہ ٹیم میں کائل جیمیسن اور راچن رویندرا کو شامل کیا ہے۔
بنگلا دیش کے کپتان نجم الحسن شانتو نے کہا تھا کہ ٹاس جیتتے تو فیلڈنگ کرتے، ٹیم میں 2 تبدیلیاں کی ہیں۔
واضح رہے کہ اس شکست کے بعد بنگلادیشی ٹیم آئی سی سی چیمپئنز ٹرافی سے باہر ہوگئی۔ پاکستان کے خلاف گروپ اسٹیج کا اسکا میچ صرف رسمی کارروائی ہوگا۔
خیال رہے کہ نیوزی لینڈ نے اپنے پہلے میچ میں پاکستان کو شکست دے تھی جبکہ بنگلادیش کو بھارت نے ہرایا تھا۔