فیڈرل بی ایریا واٹر پمپ سے عائشہ منزل جاتے ہوئے تیز رفتار ٹرک نے موٹر سائیکل سواروں کو روند ڈالا جس کے نتیجے میں ایک نوجوان جاں بحق جبکہ دوسرا شدید زخمی ہوگیا۔
اس موقع پر مشتعل مظاہرین نے ٹرک کو آگ لگا دی جس کے باعث شارع پاکستان پر ٹریفک کی روانی شدید متاثر ہوگئی، واقعہ کی اطلاع ملتے ہی جوہر آباد پولیس موقع پر پہنچ گئی اور فوری طور پر فائر بریگیڈ کو طلب کرلیا۔
ریسکیو حکام کا کہنا ہے کہ متوفی نوجوان کی فوری طور پر شناخت نہیں ہو سکی اور اس کی عمر 25 سال کے قریب بتائی جا رہی ہے جبکہ شدید زخمی نوجوان کی شناخت 24 سالہ عرفان کے نام سے کی گئی جسے ایدھی کے رضا کاروں نے طبی امداد کے لیے عباسی شہید اسپتال منتقل کر دیا۔
ایس ایچ او جوہر آباد راشد الرحمٰن نے بتایا کہ حادثہ کنٹینر سے لدے ٹرک سے پیش آیا ہے جبکہ ڈرائیور کو گرفتار کرلیا گیا ہے اور اس ضمن میں مزید تحقیقات کی جا رہی ہیں۔