کراچی کے شمال اور شمال مشرقی حصے پر گرمی کے باعث بادلوں کی تشکیل ہوئی ہے، جن سے کراچی کے مضافات میں 1 سے 2 گھنٹوں میں آندھی اور بارش کا امکان ہے۔
یہ امکان ظاہر کرتے ہوئے محکمۂ موسمیات کے سائیکلون الرٹ سینٹر نے اعلامیہ جاری کر دیا۔
محکمۂ موسمیات کا کہنا ہے کہ سپر ہائی وے، ڈی ایچ اے سٹی، سرجانی ٹاؤن میں آندھی اور بارش ہو سکتی ہے، گڈاپ، اسکیم 33، ملیر، بن قاسم میں بھی آندھی اور بارش ہو سکتی ہے۔
محکمۂ موسمیات کے مطابق جنوب مشرقی بحیرۂ عرب پر موجود ہوا کا کم دباؤ ہے،جو کراچی کے جنوب مشرق میں تقریباً 1000 کلو میٹر پر محیط ہے۔
سازگار موسمیاتی حالات کے باعث آئندہ 2 سے 3 روز کے دوران یہ سسٹم ڈپریشن بن سکتا ہے، یہ سسٹم شمال مغرب کی طرف بڑھے گا۔
محکمۂ موسمیات نے بتایا ہے کہ پاکستان کے ساحلی علاقے کو اس سسٹم سے کوئی خطرہ نہیں، سائیکلون وارننگ سینٹر کراچی سسٹم کی نگرانی کر رہا ہے۔
ہوا کا کم دباؤ طوفان بن سکتا ہے: چیف میٹرولوجسٹ
اس سے قبل چیف میٹرولوجسٹ سردار سرفراز نے ’جیو نیوز‘ سے گفتگو کے دوران پیش گوئی کی تھی کہ کراچی میں آج بھی کہیں کہیں ہلکی بارش اور آندھی چلنے کا امکان ہے۔
ان کا کہنا تھا کہ بارشوں سے کراچی میں درجۂ حرارت پر زیادہ فرق نہیں پڑے گا، آج بھی کراچی میں درجۂ حرارت 40 ڈگری سینٹی گریڈ تک جا سکتا ہے۔
یہ بھی پڑھیے
چیف میٹرولوجسٹ کا کہنا تھا کہ کراچی میں 20 اکتوبر کے بعد امکان ہے کہ درجۂ حرارت میں کمی ہو جائے۔
انہوں نے کہا کہ شمالی علاقہ جات میں رات کا درجۂ حرارت سنگل ڈیجیٹ میں پہنچ گیا ہے۔
سردار سرفراز نے کہا کہ بحیرۂ عرب کے جنوب مشرق میں ہوا کا کم دباؤ بن چکا ہے، آئندہ ایک سے دو روز کے دوران ہوا کا یہ کم دباؤ شدت اختیار کر کے ڈپریشن بن سکتا ہے۔
ان کا یہ بھی کہنا تھا کہ سازگار ماحول ملنے پر ڈپریشن سمندری طوفان بن سکتا ہے، مون سون کے بعد بننے والے سمندری طوفانوں کا زیادہ تر رخ عمان کی جانب رہتا ہے، پاکستان کی ساحلی پٹی کو فی الحال اس سسٹم سے کوئی خطرہ نہیں۔
واضح رہے کہ گزشتہ روز بھی کراچی کے کچھ علاقوں میں آندھی کے ساتھ بارش ہوئی تھی۔