عالمی برادری فلسطینی عوام کو درپیش مسائل کی روک تھام کے لیے عملی اقدامات کرے، سعودی وزارت خارجہ
اسرائیلی انتہا پسند وزیر برائے قومی سلامتی اتما بن گویر نے مسجد اقصیٰ کے اندر یہودی عبادت گاہ بنانے کا اعلان کر کے حماس اسرائیل جنگ کو مزید ہوا دیدی ہے۔
اس نفرت انگیز بیان کو اسرائیل کی طرف سے دھمکی بھی قرار دیا جا رہا ہے۔ جس پر سعودی عرب کا مذمتی بیان سامنے آیا ہے۔
اس حوالے سے سعودی وزارت خارجہ نے کہا ہے کہ شدت پسندی پر مبنی اسرائیلی بیان کو مسترد کرتے ہیں، مسجد اقصیٰ کی تاریخی اور قانونی حیثیت کا احترام کیا جائے۔
سعودی وزارت خارجہ کا کہنا ہے کہ عالمی برادری فلسطینی عوام کو درپیش مسائل کی روک تھام کے لیے عملی اقدامات کرے۔
عرب میڈیا کے مطابق سعودی عرب کا مزید کہنا ہے کہ عالمی قوانین اور قرار دادوں کی خلاف ورزیوں پر اسرائیل کو جوابدہ ٹھہرانے کے لیے سنجیدہ کوششیں کی جائیں۔
واضح رہے اسرائیلی وزیر اتمار بن گویر کا ایک انٹرویو میں کہنا تھا کہ وہ مقبوضہ بیت المقدس میں واقع مسجد اقصیٰ کے کمپاؤنڈ میں یہودی عبادت گاہ ضرور بنائیں گے، ساتھ ہی اس مقدس جگہ پر اسرائیلی جھنڈا بھی لگائیں گے۔