غیرقانونی تعمیرات کیخلاف درخواستیں، سابق ڈی جی ایس بی سی اے کے وارنٹ گرفتاری

سندھ ہائی کورٹ نے کراچی میں غیر قانونی تعمیرات کے خلاف درخواستوں پر سابق ڈی جی ایس بی سی اے یاسین شر کے وارنٹ گرفتاری جاری کردیئے۔ جسٹس ندیم اختر کی سربراہی میں دو رکنی بینچ کے روبرو کراچی میں غیر قانونی تعمیرات کے خلاف درخواستوں پر سماعت ہوئی۔ ڈی جی ایس بی سی اے اسحاق کھوڑو و دیگر حکام بھی عدالت میں پیش ہوئے۔ عدالت نے ریمارکس دیئے کہ عدالتی احکامات پر عملدرآمد کیوں نہیں ہوا، غیر قانونی تعمیرات مسمار نہ کرنے میں ملوث افسران کے خلاف کارروائی کی؟ غیر قانونی تعمیرات میں ملوث افسران کے خلاف شوکاز کے بعد کوئی کارروائی ہی نہیں کی گئی۔ جسٹس ندیم اختر نے ریمارکس دیئے کہ اس کا مطلب تو یہی ہے کہ شوکاز وغیرہ صرف کورٹ کی آنکھوں میں دھول جھونکنا ہے۔ سندھ بلڈنگ کنٹرول اتھارٹی اول تو کوئی کام نہیں کرتا ،دوسرا جو ادارے میں کرپٹ لوگوں کو اہم عہدوں پر بٹھایا ہوا ہے۔ ڈی جی صاحب! آپ کو تو معطل ہونا چاہیے اسی وقت، عدالت نے اسحاق کھوڑو کی سرزنش کی۔ ڈی جی ایس بی سی اے نے کہا کہ سر ہم نے انجینئر عامر خان کو معطل کر دیا تھا۔ عدالت نے ریمارکس دیئے کہ معطل کیا ہوتا ہے؟ اس کو تو نوکری سے برطرف کردینا چاہیے تھا۔ جسٹس ندیم اختر نے ریمارکس دیئے کہ معطل کوئی سزا ہوتی ہے؟ یہ تو اپنی پوری تنخواہ اور مراعات لے رہا ہے۔ عدالت نے ڈپٹی ڈائریکٹر شاہد شیخ کو روسٹرم پر طلب کرلیا۔