عدالت کاتفتیش مکمل کرکےآئندہ سماعت پر چالان پیش کرنے کا حکم، منشیات کے نئے مقدمہ میں ملزمہ نتاشا کے پروڈکشن آرڈر جاری
کراچی کے علاقے کارساز میں نشے کی حالت میں کار چلانے اور دو لوگوں کی جان جانے کے کیس میں ملزمہ نتاشہ کے خلاف مقدمے میں ایک اور سیکشن کا اضافہ ہوگیا جبکہ عدالت نے تفتیش مکمل کرکےآئندہ سماعت پر چالان پیش کرنے کا حکم دے دیا۔
تفصیلات کے مطابق تفتیشی پولیس نے موٹروہیکل کی دفعہ 100 کو شامل کردیا۔ واضح رہے کہ سیکشن 100 شراب یا دیگر نشے کے زیراثر ڈرائیونگ پر لگتی ہے۔
ملزمہ نتاشہ کی رپورٹ میں دوران ڈرائیونگ مہلک نشے آئس کے استعمال کا انکشاف ہوا تھا، میڈیکل رپورٹ کے بعد نتاشہ کے خلاف نشے کا مقدمہ درج ہوا۔ ایف آئی آر میں موٹروہیکل سیکشن 100 کو شامل کردیا گیا ہے۔
منشیات کے نئے مقدمہ میں ملزمہ نتاشا کے پروڈکشن آرڈر جاری
علاوہ ازیں سٹی کورٹ کراچی میں کارساز حادثہ کیس میں تفتیشی افسر نے عدالت کو بتایا کہ متاثرین کے بیانات قلم بند کرلئے ہیں، ڈی آئی جی لائسنس برانچ سے ملزمہ لائسنس کی رپورٹ طلب کی ہے، تمام رپورٹس موصول ہونے میں کچھ وقت لگے گا۔
تفتیشی افسرنے بتایا کہ لائسنس کی تصدیق کیلئےبرطانوی ایمبیسی سے رابطہ کیا ہے، سی سی ٹی وی فرانزک کیلئے پنجاب فرانزک لیب بھیجی ہیں۔
بعدازاں عدالت نے تفتیشی افسر کو پانچ ستمبر تک مہلت دیدی اور تفتیش مکمل کرکےآئندہ سماعت پر چالان پیش کرنے کا حکم دے دیا۔ منشیات کے نئے مقدمہ میں ملزمہ نتاشا کے پروڈکشن آرڈر بھی جاری کردیے۔
یاد رہے کہ 19 اگست کے دن ملزمہ نتاشا نے نشے کی حالت میں دھت لینڈ کروزر ڈرائیو کے دوران باپ بیٹی سمیت کئی موٹر سائیکل سوار افراد کو روند ڈالا تھا۔ جس میں باپ بیٹی جاں بحق اور 5 افراد زخمی ہوئے تھے۔ کئی گاڑیوں کو شدید نقصان پہنچایا تھا۔