خرم نثار اپنا اکاؤنٹ خالی کررہا ہے

ڈیفنس میں پولیس اہلکار کا قتل: ملزم کے حوالے سے مزید حقائق سامنے آگئے

ملزم نے اپنے اکاؤنٹ سے غیر ملکی ائیرلائن کا ٹکٹ خریدا، اکاؤنٹ کی تفصیل پولیس نے حاصل کرلی

خرم کے بار بار اکاؤنٹ سے رقم نکالنے کی وجہ سے پولیس نے غیر ملکی بینک کو اکاؤنٹ فریز کرنیکا خط لکھ دیا

ملزم قتل کرنے کے بعد دوستوں سے ملا، شامل تفتیش کرلیا گیا، مقدمہ سی ٹی ڈی کو ٹرانسفر کرنے کی درخواست

کراچی ( کرائم رپورٹر) کراچی کے علاقے ڈیفنس میں پولیس اہلکار کے قتل کیس میں اب تک کی تحقیقات میں مزید حقائق سامنے آگئے۔پولیس اہلکار کے قتل کے تفتیش کاروں نے مقدمہ سی ٹی ڈی کو ٹرانسفر کرنے کی درخواست کردی۔تفتیشی حکام کا کہنا ہے کہ ملزم خرم پہلے اپنے گھر اور پھر کلفٹن بلاک 4 میں ریسٹورنٹ گیا، ملزم ریسٹورنٹ سے پھر ایک چائے خانے پر دوستوں کے پاس گیا، جہاں اس کی ملاقات اپنے دوستوں ارسلان اور فرید سے ہوئی۔ حکام کا کہنا ہے کہ فرید اچکزئی ہی خرم نثار کو چھوڑنے ایئرپورٹ گیا، دونوں دوستوں کو پولیس نے شامل تفتیش کر لیا ہے۔تفتیشی حکام کا کہنا ہے کہ خرم نثار نے اپنے اکاؤنٹ سے ہی غیر ملکی ایئرلائن کا ٹکٹ خریدا، ملزم کے اکاؤنٹ کی تفصیلات پولیس نے حاصل کر لی ہیں، ملزم اپنے اکاؤنٹ سے بار بار رقم نکال رہا ہے، اکاؤنٹ فریز کرنے کیلئے غیر ملکی بینک کو خط لکھ دیا ہے۔واضح رہے کہ 21 اور 22 نومبر کی درمیانی شب کراچی کے علاقے ڈیفنس فیز 5 میں 26 اسٹریٹ پر کار سوار ملزم خرم نثار نے فائرنگ کر کے شاہین فورس کے اہلکار عبدالرحمٰن کو قتل کر دیا تھا۔