ملک اور قوم کوعظیم بنانا ہے تو عمران خان سے نجات ضروری ہے، حافظ حمداللہ

پی ڈی ایم کے ترجمان حافظ حمداللہ کا کہنا ہے کہ ملک اور قوم کوعظیم بنانا ہے تو عمران خان سے نجات ضروری ہے۔

انہوں نے اپنے بیان میں کہا ہے کہ عوام کو آٹے، چینی کے بعد اب پیٹرول کے لئے بھی قطار میں کھڑا کردیا ہے، تین سال سے عظیم قوم ایک نالائق اور اناڑی کے ہتھے چڑھ چکی ہے۔

حافظ حمداللہ نے کہا کہ عمران خان نے قوم کو ایک عظیم بھکاری قوم بنادیا ہے، حکمران مہنگائی کم کرنے کےبجائے مہنگائی کے فوائد گنوا رہے ہیں۔

پی ڈی ایم کے ترجمان کا کہنا ہے کہ عمران حکومت اور مسلط رہی تو وہ دن دورنہیں کہ قوم مردے بغیر کفن دفنانے پر مجبور ہوگی، آئی ایم ایف کے ساتھ سخت ترین شرائط پر شوکت ترین کا تازہ ترین معاہدہ عوام کے لئے مشکل ترین ثابت ہوگا۔

انہوں نے کہا کہ عمران خان آئی ایم ایف کے سامنے پہلے ہی لیٹ چکا تھا اور اب اس معاہدے سے قوم کو آئی ایم ایف کے سامنے لٹا دیا ہے، معاہدے کے تحت منی بجٹ لایا جارہا ہے جس سے پیٹرول سمیت کھانے پینے کی اشیاء میں مزید اضافہ ہوگا۔

حافظ حمداللہ نے مزید کہا کہ اسٹیٹ بینک قوم کا، پیسہ بھی قوم کا، مگر اختیار آئی ایم ایف کا ہوگا، یہ ہے نیا پاکستان، ملک اور قوم کوعظیم بنانا ہے توعمران خان سے نجات ضروری ہے دوسرا کوئی نجات کا راستہ نہیں ہے۔