وزیراعظم نے بین الاقوامی کمپنیوں کا پاکستان میں منصوبے شروع کرنا خوش آئند قرار دے دیا

اسلام آباد : وزیراعظم عمران خان نے بین الاقوامی کمپنیوں کا پاکستان میں منصوبے شروع کرنا خوش آئند قرار دیتے ہوئے کہا نوجوان بین الاقوامی آئی ٹی اور ٹیلی کام کمپنیز سے بہت فائدہ اٹھا سکتےہیں۔

تفصیلات کے مطابق وزیراعظم عمران خان سے ویون گروپ کے سی ای او کان ترزیو اوغلون کی ملاقات ہوئی ، ملاقات میں مشیر خزانہ شوکت ترین، چیئرمین پی ٹی اے ،جاز کےسی ای او موجود تھے۔

وزیراعظم عمران خان نے کہا کہ نوجوان بین الاقوامی آئی ٹی اور ٹیلی کام کمپنیز سے بہت فائدہ اٹھا سکتےہیں، پاکستانی نوجوانوں کا ٹیلنٹ بےمثال ہے، بین الاقوامی کمپنیوں کی جانب سے پاکستان میں منصوبے شروع کرنا خوش آئند ہے۔

وزیراعظم آفس کی جانب سے بیان میں کہا گیا کہ وزیراعظم نے ٹیکنالوجی منتقلی اور نوجوانوں کی تربیت پرزور دیا، سی ای او ویون نے ڈیٹا کے بڑے حل فراہم کرنے میں دلچسپی ظاہر کی۔

اس سے قبل وزیراعظم عمران خان سے آن لائن کمپنی دراز گروپ کے سی ای او بجارک میکلسن کی ملاقات ہوئی تھی ، وزیراعظم نے کہا تھا کہ پاکستان ای کامرس کیلئے بہت وسیع مارکیٹ رکھتا ہے، ای کامرس سے روزگار کے مواقع پیدا ہوں گے اور معاشی ترقی میں مدد ملے گی۔

عمران خان کا کہنا تھا کہ حکومت کاروبار میں آسانی پالیسی کے تحت مکمل تعاون فراہم کر رہی ہے، جس پر کمپنی سی ای او نے مزید سرمایہ کاری اورای کامرس کی توسیع میں دلچسپی کا اظہار کیا۔