ٹی ٹوئنٹی ورلڈ کپ: میتھیو ہیڈن اور ورنن فلینڈر پاکستانی ٹیم کے کوچ مقرر

پاکستان کرکٹ بورڈ نے آسٹریلیا کے سابق اوپننگ بیٹسمین میتھیو ہیڈن اور جنوبی افریقہ کے سابق فاسٹ بولر ورنن فلینڈر کو ٹی ٹوئنٹی ورلڈ کپ کے لیے پاکستانی کرکٹ ٹیم کی کوچنگ کی ذمہ داری سونپ دی ہے۔

ان دونوں کو یہ ذمہ داری سونپے جانے کا باضابطہ اعلان پاکستان کرکٹ بورڈ کے نو منتخب چیئرمین رمیز راجہ نے پیر کے روز لاہور میں ہونے والی پریس کانفرنس میں کیا۔ چیئرمین منتخب ہونے کے بعد رمیز راجہ کی یہ پہلی پریس کانفرنس تھی۔

رمیز راجہ نے یہ بھی کہا کہ ان دونوں کے علاوہ پاکستانی ٹیم کے لیے نئے ہیڈ کوچ کی تقرری بھی جلد کی جائے گی۔

یاد رہے کہ ٹی ٹوئنٹی ورلڈ کپ آئندہ ماہ اومان اور متحدہ عرب امارات میں شروع ہونے والا ہے۔ پاکستانی کرکٹ ٹیم اپنا پہلا میچ 24 اکتوبر کو انڈیا کے خلاف دبئی میں کھیلے گی۔

میتھیو ہیڈن اور ورن فلینڈر کی تقرری مصباح الحق اور وقاریونس کی جگہ کی گئی ہے۔ ان دونوں نے پاکستانی کرکٹ ٹیم کے دورہ ویسٹ انڈیز کے اختتام پر چھ ستمبر کو اپنے عہدوں سے استعفی دے دیا تھا۔

پاکستان کرکٹ بورڈ نے ان دونوں کے مستعفی ہو جانے کے بعد نیوزی لینڈ کے خلاف ہوم سیریز کے لیے ثقلین مشتاق اور عبد الرزاق کو وقتی طور پر کوچنگ کی ذمہ داری دی تھی۔

یہ بات طے ہے کہ ٹی ٹوئنٹی ورلڈ کپ کے بعد کسی غیرملکی کوچ کو ہی پاکستانی کرکٹ ٹیم کا مستقل ہیڈ کوچ مقرر کیا جائے گا۔