سندھ میں رہنے والے ایک دوسرے کے حقوق کا تحفظ کریں، رہنما ایم کیو ایم پاکستان
ایم کیو ایم پاکستان کے رہنما خواجہ اظہار الحسن نے کے فور منصوبے میں تاخیر پر وفاق اور سندھ حکومت کو شدید تنقید کا نشانہ بناتے ہوئے کہا ہے کہ موجودہ حکومتی رویہ یہ ظاہر کر رہا ہے کہ 2030 تک کراچی والوں کو پانی نہیں ملے گا۔
میڈیا سے گفتگو کرتے ہوئے خواجہ اظہار نے کہا کہ کے فور منصوبے پر ایک بار پھر کراچی کے شہریوں کو دھوکا دیا گیا ہے۔ نہ ہمیں ترقیاتی فنڈز دیے جارہے ہیں اور نہ ہی کوئی اور اقدامات کیے جا رہے ہیں۔
ایم کیو ایم رہنما نے سندھ حکومت پر تنقید کرتے ہوئے کہا کہ سندھ کی سرزمین پر صرف دھوکہ دیا جاتا ہے۔ سندھ میں بسنے والے ایک دوسرے کے حقوق کا تحفظ کریں ان کے حقوق پر ڈاکا نہ ڈالیں۔
ڈومیسائل کیس پر بات کرتے ہوئے خواجہ اظہار نے کہا کہ سندھ حکومت کی ناقص پالیسیوں نے پورے صوبے کو یتیم خانہ بنا دیا ہے۔ انہوں نے مطالبہ کیا کہ ترقیاتی منصوبوں میں شفافیت اور مساوی وسائل کی تقسیم کو یقینی بنایا جائے۔